Y e ganador di ‘Best Business Concept Award’ ta Eco Living Aruba
ORANJESTAD (AAN): Na Aruba Marriott Resort & Stellaris Casino, a anuncia e ganador di e premio Guardian Group Best in Business Award y e ganador di Best Business Concept (mihor concepto empresarial).
E Best Business Concept a wordo introduci prome biaha pa motiva empresanan chikito y mediano. Door di participa den e categoria di Best Business Concept bo ta ricibi un plan di negoshi den forma gratuito y como nominado bo ta ricibi un Analisis di bo concepto/negoshi cu por yuda bo desaroya bo plan di negoshi.
E 5 nominadonan di Best in Business (BIBA) ta: Cornerstone Economics (Lay Hing de Kort-Yee y Rendell de Kort), Muscles and Lungs Crossfitness Aruba (Javier Erasmus y William Erasmus), Lindy Lifestyle Boutique (Alexlindy Croes), GRP Architects & Construction (Gershon y Leila Pocorni) y SlipNot Solution (Sharona Lee-Schoop).
E 5 nominadonan a duna un presentacion un siman prome na e miembronan di hurado, na unda nan por a splica encuanto nan servicio y demostra (showcase) nan producto. Tabata tin oportunidad di contesta tur preguntanan na e miembronan di hurado cu ta e siguiente personanan: Sra. Sonja Velthuizen di Camara di Comercio de Aruba, Sra. Maria Dijkhoff-Pita di Departamento de Asuntonan Economico, Comercio y Industria, Sra. Anushka Lew Jen Tai, di EY accountants, Sr. Patrick Arens, di Universidad di Aruba y como Presidente di Hurado, Sr. Jacques van der Scheer, di Guardian Group Aruba.
E proceso completo desde inicio di registracion te cu e anochi final a wordo guia pa d & i Business Support, kende a traha durante 10 aña cu Guardian Group Best in Business na Corsow y awor 3 aña na Aruba.
E directora di Camara de Comercio di Aruba, Sra. Sonja Velthuizen, a haci entrega di un Premio Special na Sra. Sharona Lee-Schoop di SlipNot Solution, cual ta un curso special pa Empresario cu lo yuda su negoshi crece y yega un proximo nivel.
E tension tabata halto prome cu e Director di Guardian Group Aruba, Sr. Jacques van der Scheer, a anuncia GRP Architects & Construction (Gershon y Leila Pocorni) como e ganadornan di Best in Business y e premio den efectivo di 10.000 florin. Tur e nominadonan den e categoria di Best in Business a ricibi 1 luna di promocion na radio y e ganador a ricibi 3 luna di promocion di ECA Communications (Aldrich Croes). EY Accountants a regala e nominadonan un Consulta gratuito encuanto impuesto.
E 3 nominadonan di Best Business Concept ta: Eco Living Aruba (Daniel Barros), OFLOW (Erwin Ras) y Seamless Rain Gutters (Rodney Bareño). Tur 3 nominado den e categoria a ricibi for di Minister di Finanzas, Economia y Cultura, Sra. Xiomara Ruiz-Maduro, un curso gratuito na e Departamento di Asuntonan Economico, Comercio y Industria special pa empresanan chikito y mediano.
Prome cu e resultado final a wordo anuncia di Best Business Concept, e invitadonan a participa emitiendo nan voto a traves di un aplicacion cu tabata un momento innovador di e anochi. E reaccion di e ganador: Eco Living Aruba (Daniel Barros) tabata inolvidabel ora e resultado a wordo proyecta ariba e pantaya grandi.
Eco Living Aruba a gana 2.500 florin como Best Business Concept 2019. Cu e Proyecto aki Guardian Group, ta ofrece un plataforma pa negoshinan chikito y mediano pa aumenta e calidad y crecemento di nan negoshi cu guia y formacion continuo.
Ambos ganador, Gershon Pocorni (GRP Architects & Construction/BIBA) y Daniel Barros (Eco Living Aruba/BBC) tabata super contento y a motiva otro negoshinan na Aruba durante nan breve discurso pa registra otro aña y experencia loke nan a siña den e ultimo lunanan den e proceso di participacion.
Tambe nan a expresa nan gratitud y e oportunidad brinda door di Guardian Group pa negoshinan chikito y mediano. Di parti di Guardian Group un agradecimento special na Minister di Finanzas, Economia y Cultura, Xiomara Ruiz-Maduro pa su presencia y discurso y tambe na e Maestra di Ceremonia, Larissa Bermudez, na Iliene Corsen y su equipo di d & i Business Support, na tur empresa cu a registra y por ultimo tur e nominadonan den ambos categoria cu a demostra pasion y compromiso den loke nan ta haci pa realisa nan soño y contribui na e economia y desaroyo di Aruba.
