Dia Internacional di Hende Homber
ORANJESTAD (AAN) –No ta solamente e ser femenino tin un dia special, 8 di maart, riba cual internacionalmente e ta wordo aprecia y balora den tur su facetanan como hende muhe.
T’asina cu desde 1990 mas cu 70 pais awe, 19 di November, ta celebra “Dia International di e Ser Masculino” (International Men’s Day).
Riba e fecha aki ta pone atencion riba e ser masculino, mucha y adulto, den tur area di diversificacion y ta pone enfasis riba algun reto social importante cu e ser masculino ta enfrentando mundialmente.
E ta un dia pa crea “awareness” riba cierto retonan cu e hende homber ta wordo confronta cun’e tur dia y cu mayoria di bes ta wordo neglisha.
Den e articulo aki Sra. Mary-Lou de Windt, nutricionista y coach di bida, ta sigui informa riba e nificacion di celebracion di “International Men’s Day” y tambe ta pone atencion riba cierto puntonan di importancia cu ta concerni e ser masculino.
E otro metanan di e celebracion di e fecha aki ta pa enfoca riba cierto problemanan di e hende homber, mucha y adulto, manera salubridad y seguridad, tambe riba e tema tocante tolerancia di violencia contra hende homber.
Pasobra no ta solamente hende muhe ta bira victima di abuso verbal y fisico, explotacion sexual y violencia domestico, pero tambe hende homber, mucha y adulto mundialmente.
Mescos pa loke ta trata e tema di homosexualidad pa cua ainda ta existi hopi incomprension y discriminacion.
E aña aki e tema di “Dia Internacional di e Ser Masculino” ta: “Making a difference for Men and Boys”.
Especialmente e hoben masculino tin necesidad di tin un adulto como modelo ehemplar pa un desaroyo y bienestar positivo y p’asina crea un sociedad sano y sigur den cual ta duna cada un e oportunidad pa prospera”.
Sra. De Windt tambe ta trece dilanti cu ta momento pa para keto riba problemanan di salud cerca hende homber. “Ta generalmente conoci cu hende homber semper ke mustra fuerte y ta neglisha di bishita un docter na momento cu e tin un keho. Ta importante pa e hende homber bira mas conciente cu e actitud aki mas bien por tin consecuencia negativo pa su salud.
Mi ta di opinion cu mester duna mas informacion y crea mas enfoke riba cierto malesanan cu ta concerni solamente e hende homber, manera malesa di cancer di prostaat y cancer testicular. Malesanan cu si nan wordo atendi na tempo por preveni hopi mas problema di salud.
Lamentablemente ainda aki na Aruba ta existi cierto tabu riba e malesanan aki y awendia mundialmente e malesanan aki ta birando hopi prevalente bou di hende homber. Alaves ta importante pa informa e hende homber riba e posibilidad cu e tambe por haya e malesa di cancer na pecho mescos cu un hende muhe.
Y awe, “Dia Internacional di e Ser Masculino”, ta bon pa nos como mayor y educador tambe para keto y reflexiona riba e estilo di educacion cu ta duna e yiu homber. Educa e yiu homber cu amor y respet, norma y balornan di bida, cu responsabilidad y igualdad.
Esakinan ta factornan cu ta esencial den su crecemento y desaroyo personal y nan ta yud’e bira un persona independiente y conciente di su debernan riba un manera responsable.
Siñ’e expresa y comparti su pensamento y sentimento na un manera sincero y dun’e semper bo apoyo na un manera positivo. Mayor y educador tin por gran parti influencia riba e estilo di bida di e yiu.
Mi ta finaliza cu un caluroso pabien y miho deseonan na tur ser masculino di Aruba y mi ta spera cu awe e hende homber mes tambe ta para keto y reflexiona riba e nificacion special di e dia aki , e dia cu internacionalmente ta wordo dedica na tur ser masculino”.
