Home General Otro siman Santa Rosa lo ta inaugurando e hofi ganador di Colegio...

Otro siman Santa Rosa lo ta inaugurando e hofi ganador di Colegio Conrado Coronel

78
0
SHARE
- Advertisement -

Directora Natalie Maduro:

ORANJESTAD (AAN) – Manera ta conoci den pasado, Departamento di Agricultura, Cria y Pesca (LVV), conoci como Santa Rosa, tabata tin un proyecto na unda cu scolnan por a cuminza cu nan hofi.

Natalie Maduro, directora di LVV, den un entrevista cu DIARIO a relata cu e muchanan tabata participa den tayernan di trabao, y tin scolnan cu a pidi mas tanto matanan herbal, dependiendo di e area unda e scol ta ubica.

Natalie Maduro a splica cu na comienzo di e aña aki, LVV a cuminza cu otro proyecto cu tabata e “hofi di amistad”. E meta tras di esaki ta pa laga e muchanan mes traha un planning di con nan kier mira nan hofi.

LVV a haya un total di 11 scol cu a participa, di cual Colegio Conrado Coronel a sali ganador. Otro siman LVV lo ta inaugurando nan hofi. Na comienzo di aña e scol ganador a wordo anuncia, na unda a planta dos mata di fruta djis pa cuminza e proyecto.

“Pero nan ta bay haya nan bakinan pa nan siña planta berdura. Nan ta bay haya diferente mata di fruta pa nan siña con pa cuida nan. No ta solamente esey, Santa Rosa ta bay sosten e proyecto completo na e scol aki, door di duna diferente tayer di trabao”, sra. Natalie Maduro a menciona, y a indica tambe cu e kleuterschool di Conrado Coronel tambe ta bay haya su baki.

El a splica cu cada scol cu nan bishita, nan ta envolve e kleuterschool tambe.

Sra. Maduro a expresa cu e ta gradici cu tur e gruponan interesa cu tin, entre nan uno cu a lanta cu e nomber “Ban lanta y planta”.

Santa Rosa ta bezig cune, dunando conseho pa loke ta trata e matanan local, y el a menciona sra. Angela Lacle cu ta hopi activo, e ta bayendo diferente scol cu e meta di motiva e muchanan pa cuminza nan hofi chikito pero na un manera sostenible, reciclando, usando palet.

Director di LVV ta haya cu e departamento aki tin su responsabilidad pa trece informacion, sostene e productornan local y educa e muchanan.

“Pero e parti di mas bunita ta, si nos tin un comunidad cu ta cargue. Den plannan pa otro aña, nos ta bay enfoca mas riba tayernan di trabao y training. Nos ta bezig caba cu enseñanza pa empleo, na unda nos tin e proyecto di horticultura basico, y mi mester bisa cu e klasnan ta yen yen. Cada bez cu un les caba otro les ta cuminza. Y tambe tin e oportunidad di tuma e tayer di trabao di lesnan di aquaponics pero pa otro aña”, Directora di LVV a duna di conoce.

El a sigui bisa cu mirando cu tin asina tanto interes, y teniendo na cuenta cu tin limitacion di tereno, con cu mire, mester planifica na largo plazo. Esaki pasobra por tin mas hende cu kier produci pero kizas no tin un tereno cu ta apto pa haci uso di e suelo.

“Mediante e tayernan di trabao aki nan ta siña con pa set up e sistema usando materialnan cu tin na Aruba mes, y hopi biaha ta materialnan cu hasta e persona por recicla kizas for di otro ekiponan cu tin den e cura di cas, y alavez e ta un sistema unda ta re-uza e mesun awa. “Pues, nos mester bira un tiki mas pro activo pa colecta awa di yobida. Nos por wak cu tin hopi limitacion den temporada di secure y yobida, pues aworaki cu ta cay mas awa cu bo por colecta ta mihor pa bo mes den futuro”, sra. Natalie Maduro a subraya.

Sra. Maduro a señala cu si tin scolnan y tin docente cu ta bezig riba plantamento riba nan mes, y nan ta desea di tin sosten di LVV, y si nan kier haya tayer di trabao, nan por contact Santa Rosa libremente.

Finalmente, e directora di LVV a referi na Women’s Club of Aruba, cu tambe a bin cu un bunita programa pa scolnan y Santa Rosa a duna tayer di trabao na e docentenan. Asina por mira cu flexibilidad semper ta presente di parti di Departamento di Agricultura, Cria y Pesca y si e docentenan ta prefera haya un training riba Diasabra of Diadomingo, LVV por organiza esaki pa nan.

 

- Advertisement -

DUNA COMENTARIO

Please enter your comment!
Please enter your name here