ORANJESTAD (AAN): Den un entrevista cu Director Edwin Tromp di Fundacion FCCA, el a splica cu tin varios proyecto di cas pa comunidad riba plan.
El a mustra cu FCCA ta wardando pa algun aprobacion di verkavelingsplan keda cla, e.o. na Canashito, Savaneta, y tambe Rooi Bosal.
Hunto cu esaki, FCCA recien a bishita un fabrica di cas pre-fab na Bogota, Colombia. Esaki den e intento di FCCA pa baha gasto di construccion di casnan na Aruba. E compania na Bogota a mustra con nan ta traha plachi di cement cu fiber. Y e prijs pa esaki ta hopi atractivo.
Si acaso nan escoge e compania aki, e ora e compania tin di manda e material pa Cartagena, y despues cu barco ta yega Aruba.
Dos aña pasa tambe FCCA a haya un compania na Hulanda cu a yuda traha e casnan na San Nicolas y Tanki Leendert na un costo mas abao cu e construccion convencional. A haya tur aprobacion y keuring pa a traha cu e material na Aruba.
DIARIO ta na altura cu na Aruba tin varios compania cu tambe ta wardando pa hopi tempo caba pa haya tereno y permiso pa habri un fabrica na Aruba, cu por traha e tipo di prefab casnan aki, y cu por alavez sirbi pa hasta bira un hub di e productonan aki pa demas islanan den Caribe. Pero nunca a tende mas di Gobierno riba esaki.
Y awor ta un sorpresa cu FCCA ta bay busca un compania te na Colombia pa yuda baha gasto di construccion na Aruba.
E material di Colombia lo bay ta pa casnan di un solo piso, y no pa edificio di piso. E lo sali FCCA hopi economico pa construccion di casnan di 52 te cu 74 m2.
