Bida di ciudadanonan na peliger
Manera ta bini dilanti den articulonan di awe, problemanan ta bolbe surgi den e Hospital cu a costa Aruba mas cu 225 Miyon Florin.
Despues di informacionnan cu DIARIO a ricibi ayera, contacto a wordo tuma cu expertonan cu a mustra cu loke a pasa den e hospital for di momento cu a dicidi riba su construccion, no ta normal mas.
E hospital cu mester cuida e prome bienestar di ciudadanonan a bira un centro di intriga, manera diferente caso serio ta trece dilanti.
Informacionnan relaciona cu e caso di fraude den laboratorio, a indica situacionnan increibel cu nunca a wordo remedia y awor ta spart riba Aruba.
E desaroyonan ta di tal grado, cu segun informantenan Gobierno di Aruba awor mester pidi Gobierno di Reino pa bin haci un investigacion.
Como ciudadanonan di Reino Hulandes, mester tin e garantia cu Arubianonan no ta na peliger den e proyecto di gobierno anterior cu a permiti un hospital sin sala di operacion, cu un boiler den e edificio cu ta un riesgo pa bida di hende y situacionnan inaceptabel.
DIARIO ta sigui busca informacion mientras e siman aki ta spera e rapport riba e caso fraude den laboratorio den cual e sospechoso principal a wordo tuma den servicio dor di gobierno anterior.
