ORANJESTAD (AAN): Un boletin emiti Diahuebs anochi trempan door di Guardacosta di Caribe Hulandes, a splica cu riba Dialuna 11 di November den oranan di anochi, cerca di Aruba nan a logra di intercepta un boto, den cual tabatin mas di 3.000 kilo di droga.
Segun Guardacosta di Caribe Hulandes, e intercepcion aki a ser haci den cooperacion estrecho cu Ministerio Publico.
E boletin ta splica cu e droga mientras tanto riba ordo di Ministerio Publico, a wordo destrui.
Awor e caso a wordo pasa pa autoridad internacional pa sigui cu e investigacion.
E informe aki ta hopi vago, y ta laga mas pregunta y poco contesta. Pasobra di con Ministerio Publico mes no por a ‘handle’ e asunto? Di con a dicidi na pase pa autoridad internacional.
Pa colmo, tin indicacion cu autoridad local posiblemente a laga e tripulacion den libertad caba casi e mesun anochi, pero e droga si a wordo confisca.
Tabatin informe persistente cu ta indica cu e forma cu a intercepta e droga, no a bay segun protocol legal, y cu pa e motibo ey a keda ningun otro recurso pa laga e narcotraficantenan den libertad.
E boletin emiti door di Guardacosta di Caribe Hulandes, tampoco no ta menciona ki tipo di droga esaki ta, sea ta cocaina of marihuana.
Y e hecho cu a warda te Diahuebs 14 di November pa duna un relato di loke a pasa, ta pone pueblo pensa si enberdad Guardacosta di Caribe Hulandes ta transparente of no.
E potret aki pa cortesia di Guardacosta di Caribe Hulandes.
