Psicologo Suely Kelly, di Centro Desaroyo Humano:
ORANJESTAD (AAN) – Suely Kelly, un hoben cu a studia Psicologia na Costa Rica, unda el a gradua aña pasa, ta comparti cu DIARIO cual ta e servicionan cu e ta brinda na Centro di Desaroyo Humano, unda e ta eherciendo actualmente.
E ta un ofrece un terapia cu yama “Theraplay” cu ta nifica terapia di wega structura pa mehora e relacion di e miembronan di famia.
Den e terapia aki, bao guia di e terapeuta ta haci wega cu tin di haber hopi cu nos sentidonan via olfato, tacto, oido, gusto y bista.
Dr. Kelly a splica cu den e prome sesion ta bay valora con e relacion di e mayor pa su yiu ta. E ta un terapia cu ta wordo dirigi pa muchanan di 0 pa 12 aña di edad.
Ta wordo observa con capaz e mayor ta pa calma su yiu si, por ehemplo, e mucha ta bay den crisis durante e terapia, of con asina capaz e mayor ta di establece regla y con capaz e mucha ta pa obedece esaki.
E profesional a subraya cu tur aspecto cu tin di haber cu e relacion e ta valora den e prome sesion, y despues bao guia di e terapeuta, nan ta haci e weganan pa asina por mehora e vinculo, entre ya sea e mama cu e yiu, of e tata cu e yiu.
E hoben a splica cu si, por ehemplo, un di e mayornan tin un adiccion, e ta wordo trata individualmente prome, y si e mayor tin un trastorno di personalidad nan no ta hinke den e terapia, pasobra emocional y psicologicamente, e no por brinda e stabilidad na e mucha.
Den e caso cu por ehemplo, e tata ta alcoholico y mester wordo traha apart, ta busca un persona cu por reemplaza e figura di e tata no ta stabil, cu por brinda e sosten na e mucha. E por ta un omo of un welo, pues un persona cu tambe ta importante pa e mucha.
Tin famianan ta bin pa busca un theraplay, pero tin biaha prome cu esaki mester haci otro tipo di terapia manera terapia sistemico. Pero tur cos ta cuestion di valoracion.
E hoben a menciona cu te ainda mayoria di e famianan cu ta bin na e terapia, ta cooperativo, sinembargo den e terapia di wega aki loke ta diferencie di otro terapianan ta, cu e ta bin conhuntamente den e terapia y ta esun cu ta bay sana su yiu.
Na mesun momento e mayor tambe ta satisface su necesidadnan cu den su infancia, no a wordo cubri pa su mayornan.
Dr. Sueli Kelly tin apenas tres luna cu e Centro y e famianan cu ta aplicando e terapia ta casonan reciente. Pero tin evidencianan cientifico cu ta demostra cu e theraplay ta yuda, e ta hopi efectivo pa e muchanan pasobra e ta e lenguahe di e muchanan. “Wega ta e lenguahe di mucha, y kico miho cu atravez di terapia di wega”, Sueli a subraya.
Den su terapia e ta mira cu tin casonan cu ta bayendo bon. E ta un bon terapia pa haci cu muchanan cu tin depresion, ansiedad, problemanan di comportacion, ADHD y espectro autista, of cu a pasa den algun trauma, por ehemplo, abuso sexual e terapia aki ta hopi beneficioso.
Loke e mayor ta transmiti durante e terapia pa e mucha ta: “bo ta safe, bo ta importante pa mi, mi ta akinan pa cuida bo.. Y e famia ta e entidad di socializacion primario di e mucha.
Pues, e ta hopi importante den su etapa di desaroyo y pa su self esteem. Pues, durante e terapia nan ta mehora tambe e self esteem di e mucha”, e Psicologo dr. Sueli Kelly a conclui.
