Home Policial Hoben di 32 aña a fayece den explosion y candela na Papilon

Hoben di 32 aña a fayece den explosion y candela na Papilon

2470
0
SHARE
- Advertisement -

ORANJESTAD (AAN): Mientras cu den cielo rond di Aruba tabata por a mira basta nubia diki ta acercando, diripiente den area di Papilon por a scucha un sonido fuerte, sigui pa algun huma diki.

Esaki tabata den e area di Papilon cu ta keda na e sede di MEP bay pabao, y despues bira na man robez.

Banda di 2:45 pm, alarma a ser bati, y tanto Centro di Alarma a despacha unidadnan di Bombero, y Central di Polis a saca patruyanan pa bay check.  Hendenan a yama y raporta di un explosion y candela na e cas Papilon 61-A.

   EXPLOSION:

Na e cas aki tin famia Kock cu nan 4 yiunan ta biba, y Polis ta investigando e declaracion di testigo, cu algun rato prome nan por a tende algo manera algo ta leak hopi mes for di un botter di gas, cu recien a wordo busca di e compania di gas na Aruba.

Algun momento despues, un explosion fuerte a wordo sinti, sigui pa candela cu a start instantaneamente.  Ey ta ora cu mesora a bati alarma pa candela.

Polisnan di Santa Cruz a ser manda pa e lugar.  Centro di Alarma a saca un unidad di Bombero for di Aeropuerto, y tambe un unidad for di Tanki Flip.  Nan a yega na e cas, cu tin un cura halto di riba 2 meter construi full rond di dje, y por a nota cu huma diki tabata saliendo di e cas.  Via di un sliding door grandi di garage, nan a logra bay paden pa asina cuminza combati e candela.

   VICTIMA:

Comandante Dido de Cuba di Cuerpo di Bombero, a splica cu nan a bin haya patras di e cas cu un sero di sushi na candela, y pida bao di e patio di cas tambe na candela.  E momento ey, bisiñanan a notifica Bombero cu kizas tin hende den e cas.

Un curpa abao den e candela, hopi cerca di e cas y e no ta duna señal mas di bida.  E tabata benta den e parti cu a kima.  Awor BFTO y Autopsia tin di determina si el a muri prome of debi na e candela.

E parti dilanti di e cas a keda OK, solamente e parti patras cu ta e cushina y area chikito di un camber a bay perdi, debi cu e candela a concentra eybanda.  E candela tabata banda di e botternan di gas cu no a rementa.  Pero muy probablemente e valvenan a laga bay.  Pesey por a mira hopi vlam ta bay halto, indicando un escape di gas.  Mester tabatin algo cu a pone e temperatura di e botter di gas bay halto y pa e relief valve a habri.

Despues cu a haya sa cu tin un hende den e candela y no ta duna señal di bida, mesora a informa demas autoridad di e asunto aki.

DETENCION:

E persona cu a perde su bida, ta un hoben di 32 aña, y autoridad a cuminza cu investigacion mesora, y den un revision preliminar, mesora a detene un ruman homber I.S.R. Kock di 37 aña di edad y kende ta biba eynan mes.  Vocero di Polis a bisa cu su detencion tabata relaciona cu na e lugar di candela e no kier a sigui ordo di Polis, y pesey a bay cune pa calme un poco na Warda di Polis.

Mientras tanto, e noticia di fayecimento di e hoben a pone cu Polis a core manda pidi Recherche, y tambe personal di Slachtofferhulp pa yuda sostene e famia.  Centro di Alarma na su turno a manda busca un Docter.

Vocero policial Lito Lacle, a confirma cu banda di 4:00 pm, Docter Texier a constata morto di Rigoberto Junior Chemi Gilberto Kock, naci na Aruba 9 di October 1987, pues tin 32 aña di edad.  E victima ta un di e yiu hombernan di famia Kock.

E victima a wordo describi como un hoben hopi keto, yen respet, talentoso, y e no ta casa y no tin yiu.

Personal di BFTO cu ta check investigacion forensico di Cuerpo Policial a yega pa asina cuminza haci investigacion.  Aki lo check tur aspecto di e candela, e posicion unda nan a haya e victima, e heridanan na su curpa, y tur esey na un forma cientifico nan haci e investigacion pa haya sa precisamente kico a conduci na e desgracia aki.

DIARIO ta expresa palabranan di profundo pesame na famia Kock-Figaroa den e momentonan dificil aki.  E potret saca di halto ta pa cortesia di Cuerpo di Bombero.

 

- Advertisement -

DUNA COMENTARIO

Please enter your comment!
Please enter your name here