Home Salud Ainda e “seasonal flu” ta circula y tuma precaucion ta sumamente importante

Ainda e “seasonal flu” ta circula y tuma precaucion ta sumamente importante

196
0
SHARE
- Advertisement -

Dr. Wilmer Salazar di DVG:

ORANJESTAD (AAN) – Matutino DIARIO a entrevista dr. Wilmer Salazar, di DVG, relaciona cu e hecho cu tin hopi hende na Aruba cu ta birando malo y un di e problemanan di salud ta e griep pisa cu ainda ta afectando varios di nos ciudadanonan.

Dr. Wilmer Salazar a indica cu e temporada di frio, calor y biento fuerte ainda ta afecta nos region, y esaki ta trece virus cu ta afecta e vianan respiratorio y esaki tin aworaki na Aruba.

Keintura, tosamento, diarea, etc., ta e desaroyo di un virus. Cual virus e ta? Salazar a menciona cu loke Departamento di Salud a detecta ta cu e virus influenza ta circulando ainda, y e influenza tipo B tambe tin den nos region.

El a bira un “seasonal flu”. Fuera di esaki tin e adenovirus cu ta causa infeccion den nanishi, garganta, pulmon y diarea, como tambe e RS Virus cu ta afecta mas tanto e muchanan bao di cinco aña di edad.

E virus aki ta causa problema respiratorio y tin casonan cu mester interna e mucha den hospital pasobra e por trece un tipo di complicacion cune. Dr. Salazar a subraya cu e clima cu nos tin aworaki por crea beneficio pa e virus por desaroya, y afecta e hendenan.

Dr. Salazar ta recomenda e ciudadanonan pa cumpli cu e medidanan simple di higiene universal. Laba man frecuentemente. Personanan cu e griep, cual ta di facil transmision y sumamente contagioso ora nan ta nister of tosa, y incluso ora ta papia, of si mishi cu obhetonan cu ta comparti cu otro, e por contagia mas hende.

El a splica cu e virus ta keda un tempo bibo den e medio ambiente, y solo y desinfectante ta destrui e virus aki. Dr. Salazar a reitera cu e medidanan basico ta esnan universal.

Mester tapa boca, evita tin contacto cu personanan cu tin sintomanan respiratorio, y si no por, uza precaucion manera meter ta. El a enfatiza cu e virus aki ta hopi limita. E tin un tempo cu e ta bay y asina e ta sigui.

El a señala cu e medidanan ta hopi importante, pasobra pa personanan cu ta hopi vulnerable of cu tin un tipo di malesa cu e virus por crea complicacion. Pues, mester ta al tanto riba esey.

E grupo di riesgo ta keda semper e personanan di edad halto (mayor di 65 aña) asocia cu algun problema medico, por ehemplo di pulmon, bronquitis, enfisema, asma, malesa cardiovascular, curazon, Diabetes cu ta baha e sistema immune, cancer, etc.

E muchanan den edad mas abao di dos aña di edad, ta e grupo mas afecta y cu tin mayor posibilidad di complicacion.

“Pesey ta hopi importante pa tene cuenta cu tur e medidanan di proteccion, evita bay lugarnan unda tin hendenan cu ta malo, y si no por evita esey, trata di proteha bo mes pa evita e tipo di malesanan aki”, dr. Salazar a enfatiza.

- Advertisement -

DUNA COMENTARIO

Please enter your comment!
Please enter your name here