Home Editorial Betico Croes a crea un pais nobo y un pueblo nobo

Betico Croes a crea un pais nobo y un pueblo nobo

184
0
SHARE
- Advertisement -

Editorial

Aruba tin un Dia di Himno y Bandera pa nos para keto y realisa e lucha, e proceso legal cu Aruba mester a atende pa e bira pais. E Himno y e Bandera ta simbolonan cu ta papia di un pais, cu su propio constitucion, legislacion y gobernacion.

18 di Maart ta ilustra e pasonan cu Aruba a tuma pa creacion di un pais cu su simbolonan y su base legal.

Pa Aruba tabata sumamente importante pa ademas di e Dia di Himno y Bandera, introduci un dia cu ta hiba nos na e hende, e Arubiano, e Pueblo cu oficialmente a nace dia Prome di Januari 1986 como e logro grandi despues di un lucha pisa.

Dia Prome di Januari 1986, un Pueblo nobo a nace pa sigui carga e bandera Arubano cu su pakete di balor, moral, sentimentonan y tur loke nos Himno Nacional ta describi como Arubiano cu su historia hancra den nos Escudo.

Prome cu Status Aparte, e nomber cu Betico Croes a duna su lucha, e persona cu a nace na Aruba tabata biba na e pais “Nederlandse Antillen” su reglanan.

Den ambiente di Reino, e persona cu tabata biba na “teritorio insular” Aruba tabata un Antiano.

Tabata dia Prome di Januari 1986 cu por a cuminsa papia di e Arubiano, cu tabata biba y traha na su pais Aruba pa cual e Arubiano ta responsabel.

Dia Prome di Januari 1986, a cuminsa skirbi historia di un pais nobo y un pueblo nobo.

Awe nos ta celebra Dia di Betico Croes, e heroe nacional cu a muri como Arubiano leu for di e pais Aruba, cu el a crea pa duna e Arubiano e derecho pa bisa cu Aruba ta su pais, su suela, su identidad humano.

E celebracion di Dia di Betico Croes ta na su luga pa Aruba no lubida e homber cu no solamente a percura pa un sistema estatal, pero pa existencia di e Arubiano cu su pakete moral, su pensamento, su naturalesa, su cultura, su idioma, su propio vocabulario, su propio tradicionnan, su propio caracteristico cu ta haci posibel pa realmente e bisa “Mi ta Arubiano”!

Betico Croes como lider a crea un pueblo ora den un lucha sagrado el a uni gran mayoria di un poblacion diversifica. Como lider, Betico Croes tabata hende den hende. E no tabata tin titulo di gobernantenan, pero a dirigi su lucha for di representacion di pueblo cu tabata Parlamento y Conseho Insular.

Union entre gruponan di habitantenan cu tabata kier ta Arubiano, e bira e base di pueblo nobo di Aruba como pais nobo.

25 di Januari ta haci nos recorda nacemento di Betico Croes cu a percura pa nacemento di nos Pueblo cu ta carga den nos bandera e dignidad cu ta e base di e Arubiano, hende di un palabra, di sinceridad, di frankesa cu ta haci capaz pa lucha pa un causa y alcansa logronan enorme.

Awe ta Dia di Betico Croes. Dia di e Arubiano di e pais Aruba, Dia di e identidad Arubano.

Awe DIARIO ta recorda Betico Croes cu a inspira Jossy Mehsen Mansur pa introduci DIARIO y lucha pa e Papiamento di Aruba. Awe nos ta recorda Betico Croes, e lider cu tabata yama tur Arubiano lider y a halsa e Arubiano cu accion legitimo naci den su curason Arubano!

Danki Betico Croes!

- Advertisement -

DUNA COMENTARIO

Please enter your comment!
Please enter your name here