Home Suceso Dama cu a bira malo durante eleccion di reina den Carnival Village...

Dama cu a bira malo durante eleccion di reina den Carnival Village a fayece

226
0
SHARE
- Advertisement -

ORANJESTAD (AAN): Un emergencia a presenta su mes Diadomingo madruga den e area patras di stage di Aruba Carnival & Entertainment Village.  Esaki a socede net na momento cu huradonan pa certamen di Reina Hubenil, Señora Carnaval, y Reina Grandi tabata contando voto.

Hendenan cu a mira e dama sak den otro, a core yama personal di Cruz Cora cu tabata den e lugar como precaucion.  Aki a mira e seriedad di e dama, y a core pidi presencia di Ambulans.

Un unidad mesora a sali for di ImSan y a yega, pa mesora paramediconan check e dama.  Su signonan vital tabata hopi abao, y aki a start mesora cu CPR.

Mas Ambulans a yega, pa asina paramediconan haya refuerzo.  Nan a keda duna CPR, y a bay cune pa Servicio di Emergencia na ImSan, pero na su yegada pa 2:45 am, docter a constata morto di e dama C.P., naci na Haiti.

Famia di e dama a indica cu e no kier a keda cas su so y a dicidi di bay compaña su amiganan cu tabata trahando den Carnival Village.  Inespera el a bira malo, a bay for di tino y cay.  Na prome instante a plama informe cu e lo a cay for di escenario.  Sinembargo despues a confirma cu ta djis den e area patras di stage el a bira malo.

Slachtofferhulp su presencia tambe a wordo rekeri pa sostene famianan cu a haya e noticia aki hopi duro.

Den Aruba Carnival & Entertainment Village por a nota cu e noticia a plama mesora eyden, y e animo di hopi hende a baha bastante.

Na famia di e dama C.P., ta bay palabranan di profundo condolencia.

 

- Advertisement -

DUNA COMENTARIO

Please enter your comment!
Please enter your name here