Home Enseñanza Muchanan di scol ta bay haya un buki di Betico Croes

Muchanan di scol ta bay haya un buki di Betico Croes

153
0
SHARE
- Advertisement -

ORANJESTAD (AAN): Durante e conferencia di prensa di Gobierno di tur Dialuna Minister di Cultura Xiomara Maduro a papia riba e celebracion cu ta bay tin rond di Dia di Betico, awor cu nos ta den siman di e fecha natalicio di Betico Croes cu ta dia 25 di Januari.

“Betico prome cu tur cos un ciudadano di pais Aruba y un maestro, pero banda di esaki tambe e tabata un politico, un estadista”.

“Un hende cu a sa di laga un legado grandi, un libertador pa nos pais”.

“Manera cu e ta wordo yama Nos Libertador Gilberto Francois ‘Betico Croes’”.

Esaki segun Maduro, kende a bisa cu en conexion cu esaki e Comision di Celebracion di Dianan Nacional a prepara un bunita manifestacion cultural dia 24 di Januari.

“E intencion ta pa nos tur na e plaza cu ta hiba su nomber, Plaza Libertador Gilberto Francois Betico Croes y akinan riba e anochi aki nos lo wordo deleita pa un concierto di e grupo cu ta hiba su nomber, esta Grupo di Betico”.

Esaki segun e mandatario, kende a sigui bisa cu nos tin cu bin hunto y duna danki na Betico pasobra nos tin hopi pa gradici na e estadista aki.

“Betico a laga un legado grandi y den su mesun palabranan manera el a indica:

‘Mi ta bay pero mi ta laga atras un herencia valioso cu ta libertad di e pueblo akinan”.

“Esakinan ta su palabranan cu el a dedica y cu awe mas cu claro ta keda atras den nos memoria”, segun Maduro, kende a bisa tambe cu ta importante pa nos hobennan e informacion akinan pa haya sa kende ta Betico.

“Pesey nos ta gradici e comision ‘Kende ta Betico’, pa e hecho cu e aña aki nos tin un buki cu nos ta bay distribui na tur e scolnan basico”.

“E buki ta contene e informacion riba kende Betico tabata, pero tambe pa nos tur por haya e informacion pa nos por gradici Betico pa tur locual el a haci pa nos”.

Esaki segun e minister, kende a indica cu e maestronan di e scolnan ta haya e buki pa duna e muchanan di 1ste, 2de y 3rde klas informacion riba Betico, mientras cu e muchanan di 4de, 5de y 6de klas ta haya un copia di e buki pa bay cas cune.

E informacion cu ta den e buki ta bay ta disponibel tambe den forma digital,

E mandatario a splica cu e buki ta papia riba kende ta Betico, di e carera profesional di Betico, pero tambe e ta papia di su trayectoria politico y e union cu el a sa di crea pa Aruba.

“Betico tabata e catalizador pa awe nos tin un pais cu conoce un Status Aparte dentro di Reino”.

“Hunto cune un grupo grandi di persona el a sa di hiba nan den un movecion, pa asina por a logra esaki”.

“Mas cu claro akiden ta papia tambe di e parti di e movecion aki cu a bira un union den pueblo, un determinacion cu el a sa di ilustra den su actonan cu el a haci den sacrificionan cu el a haci, pa asina awe nos por conta cu un Status Aparte cu ta duna nos tambe e hermentnan economico pa asina nos por a desaroya Aruba manera cu aworaki e ta desaroya”.

Esaki segun Maduro, kende a sigui bisa cu Betico a traha entre otro pa nos por tin nos propio himno y bandera cu ta trece hende hunto.

El a traha tambe riba nos ortografia di Papiamento di Aruba, pasobra lenguaje ta trece nos hunto y ta haci nos orguyoso, segun e mandatario, kende a indica cu patras den e buki tin poni algun di e dichonan di Betico cu a bira famoso.

Algun di e dichonan aki ta por ehempel:

“E felicidad cu mi ta desea pa mi propio yiunan, ta e felicidad cu mi ta desea pa henter e pueblo di Aruba”.

“No tin un lucha sin sacrificio y no tin sacrificio sin gloria”.

E Minister a haci tambe un invitacion na tur hende pa e ceremonia protocolar cu ta tuma lugar Diasabra dia 25 di Januari di 9’or pa 11’or di mainta na Plaza Libertador Betico Croes.

Ta bay tin tambe un competencia escolar di pintura rond di Dia di Betico, pa muchanan di scol basico di 1ste te cu 4rde klas.

Na final di e conferencia di prensa, minister Maduro a entrega un copia di e buki di Betico na e miembronan di prensa presente.

 

- Advertisement -

DUNA COMENTARIO

Please enter your comment!
Please enter your name here