Home Suceso Temblor di magnitud un 5,2 a bolbe sacudi Puerto Rico

Temblor di magnitud un 5,2 a bolbe sacudi Puerto Rico

57
0
SHARE
- Advertisement -

Poblacion den alerta

SAN JUAN: Un otro temblor, e biaha aki di magnitud 5,2, a sacudi Puerto Rico riba diabierna, causando mas inkietud den e poblacion, cu desde di 28 di December pasa ta sufriendo di efectonan di un actividad sismico intenso dilanti di costa zuid di e teritorio caribense.

Departamento Sismico di Puerto Rico a informa via diferente rednan social cu despues di e temblor registra no tin advertencia of vigilancia di tsunami pa teritorio Caribense y Virgin Islands, relaciona cu e temblor cu a tuma lugar pa 18:30 hora local (22:30 GMT).

E teremoto a wordo localiza den un punto exacto situa entre latitud 17,878 y longitud -66.844 cu 2 kilometer di profundidad.

E temblor a keda registra 14,4 kilometer zuid-zuidoost di municipio di Guanica.

Apesar cu e temblor a bolbe sacudi e mesun zona di e isla, esaki a wordo sinti cu forza den henter teritorio Puertoriqueño, na unda por a wak escenanan di panico entre poblacion, cu ainda no a recupera di prome temblor di diamars pasa, di un magnitud di 6,4 riba escala di Richter. E temblor aki a causa dañonan miyonario y mas di 2.000 mester a acudi na shelternan.

Segun informacionnan di gobierno, coriente no a bay den gran parti di e isla. E generacion coriente tabata di 1.777 megawatt apesar di ultimo temblor.

Puertoriqueñonan mes a mustra via rednan social, e resultado di e ultimo temblor, cu a inclui palonan di luz y di mata benta abao y murayanan daña den varios cas y edificio.

Director di Departamento Sismico, Victor Huerfano, a pidi poblacion pa keda den alerta riba e posibilidad di mas temblor. El a señala cu e actividad sismico lo sigui y e alerta ta bay keda vigente pa un tempo adicional. E departamento a registra desde cuminsamento di dia por lo menos 10 replica, cu esun mas grandi pa 15:44 (19:44 GMT) cu un magnitud di 3,4.

- Advertisement -

DUNA COMENTARIO

Please enter your comment!
Please enter your name here