L: Na nomber di Tata, di Yiu y di Spirito Santo
T: AMEN.
L: San Pedro ta bisa: “Cristo Hesus a sufri pa nos motibo y a laga un ehempel pa nos por sigui su pasonan. Riba palo di Cruz El a carga nos picanan den su mes curpa, pa di tal manera tur maldad muri den nos y nos scoge pa un bida di husticia”.
L: Rumannan: uni den Cristo Hesus nos ta sigui den su pasonan, den su sufrimento y morto, pa yaga finalmente na su resureccion feliz y sinta cun’E den Gloria di Dios Tata.
T: AMEN.
Bao di Cruz di Hesus Cristo
Ta para su mama tristo,
Mientras Yiu ta colga
1 Stashi - Pilato ta condena Hesus na Morto
Pasion y morto di Cristo a manifesta stimacion cu Dios Tata tin pa nos. El a entrega su mes Yiu pa nos.
Huan Apostel a bisa: “Asina tanto Dios a stima mundo cu El a duna nos su Yiu Unigénito, pa kende cu kere den Djé lo no bay perdi ma lo tin bida eterno. Dios no a manda su Yiu na mundo pa condena mundo, ma pa mundo haya salbacion pa medio di Dje”. (Huan 3: 16-17)
Oh Señor, Bo no a duda pa sacrifica bo Yiu, pa nos haya bida. Haci pa e amor cu nos mester tin pa cu otro sea sin limite, manera esun di Bo pa cu nos. Pa medio di Cristo nos Señor.
2 Stashi - Hesus ta tuma cruz riba su schouder
Pa medio di Cristo Hesus Dios Tata a stima nos prome.
Huan Apostel ta bisa: “Den esaki Dios su amor a manifesta su mes dentro di nos, cu Dios a manda su Yiu unigenito den mundo, pa nos lo biba pa medio di Djé.
Den esaki amor ta consisti: No ta nos a stima Dios, ma ta El a stima nos, y a manda su Yiu como sacrificio di reconciliacion pa nos picanan.
Queridonan, si Dios a stima nos asina tanto, nos tambe Mester stima otro”. (Huan 4: 9-11).
Oh Dios Bo a stima nos prome cu nos por a conoce Bo. Laga pa bo amor sea e forsa cu ta guia tur nos sentimentonan. Pa Cristo nos Señor.
- Stashi - Hesus ta cay bao di su Cruz pa prome bez
Dios a mustra su amor pa nos pa medio di esaki: Cu Cristo a muri pa nos tempo nos tabata pecador Ainda.
San Pablo Apostel ta bisa: “Lo no haya asina facil un hende cu ta duna su bida pa un hende husto, maske cu kizas den cierto caso un hende su curazon por dun’é pa haci asina. Ma Dios ta mustra su amor pa nos, hustamente pa medio di esaki: cu Cristo a muri pa nos por haya salbacion” (Rom 5: 7-8).
Oh Dios, cu a cuminsa bo obra di salbacion ora cu nos tabata pecador, hibe na feliz té na termino segun bo misericordia. Pa medio di Cristo nos Señor.
- Stashi - Hesus ta contra su Mama
Na nomber di nos tur Maria a ofrece su mes, participando den sufrimento di su Yiu.
Den Evangelio di San Lucas nos ta lesa: “Mira, e Yiu aki ta destina pa caida of lantamento di hende den Israel, como un señal di contradiccion, pa sentimento di hopi curazon lo ta revela; y bo mes alma tambe lo keda traspasa pa un lansa”. (Lucas 2: 34-35)
Oh, Maria, Mama di Hesus y di nos tur, yuda nos, pa haci nos entrega na skirmish di nos rumannan, pa asina cumpli cu e deseo di Cristo, Bo Yiu, pa yuda den Su obra di salbacion. Pa medio di Cristo nos Señor.
- Stashi - Simon di Cirene ta yuda Hesus carga su Cruz
Cristo Hesus a siña nos: “Stima otro manera M’a Stima boso”.
San Pablo Apostel ta bisa: “Rumannan, ora un hende haci un paso robez, abo cu ta un persona spiritual, mester yuda esun cu a cay, lanta atrobe. Paga tino na bo mes, pasobra bo tambe por cay den tentacion. Pesey yuda otro carga peso di nan Cruz, y asina bo ta cumpli cu ley di Cristo.” (Gal. 6:1-2).
Concede nos Señor e gracia di por sirbi nos rumannan den nan necesidad, manera Bo mes a sirbi nos, muriendo riba Cruz.
- Stashi - Veronica ta seca cara di Hesus
Pa medio di bautismo nos a keda uni cu Cristo den su Morto y resureccion y a bira un cun’E. Cristo a bisa: “Si un hende sinti berguensa di mi palabra, Yiu di hende lo sinti berguensa p’e dia E bolbe bini den su Gloria: (Lukas 9:26)
“Bini, yiunan bendiciona di mi Tata y tuma posesion Dje Reino cu ta prepara pa boso for di cuminsamento di mundo. Pasobra tur loke boso haci pa mi ruman di mas humilde, boso ta haci pa Mi”. (Mateo 25: 34,40)
Nos ta pidi Bo, Señor, pa nos reconoce imagen di bo yiu den cada un di nos rumannan, principalmente den esnan mas pober y bandona. Pa medio di Cristo nos Señor.
- Stashi - Hesus ta bolbe bay bao di Su Cruz
Cu su sufrimento y humiyacion Cristo a manifesta su amor pa nos tur y a alza nos naturaleza.
San Pablo Apostel ta bisa: “E mesun sentimento cu tabata reina den Cristo Hesus mester reina den boso, esun cu a existi den mahestad divino no kier a gara Su mes na igualdad di Dios.
El a cambia su existencia divino pa tuma puesto di esclavo. El a bira igual na hende y como hende El a aparece, humilia su mes, bira obedesido ta na morto riba Cruz”. (Flip. 2:5-8)
Dios, nos Tata, no laga nos perde animo ora nos picanan ta deprimi nos. Yuda nos cuminsa un bida nobo, siguiendo den e pasonan di Cristo. Pa medio di Cristo nos Señor.
- Stashi - Hesus ta contra cu muhernan cu ta yora
Hesus ta pidi nos pa sufrimento di su pasion por haya un luga den acontecimento nan di nos bida presente.
San Lucas ta bisa: “Un cantidad grandi di hende tabata sigui Su tras; hende muhe tabata bati nan pecho y tabata yor’E. Hesus a bira su cara pa nan y di: Yiu-muhénan di Jerusalem, no yora Mi, ma yora boso mes y boso yiunan”. (Lucas 23:28)
Oh Dios, Tata di nos tur, yuda nos stima otro cu amor sincero, pa nos por cumpli cu bo deseo. Pa medio di Cristo.
- Stashi- Hesus ta cay bao di Su Cruz pa di tres biaha
Vigilá y reza pa boso no cay den tentacion. Curazon ta di bon boluntad sí, ma carni ta debil.
San Pablo ta bisa nos: “Pesey, esun cu ta kere e ta bon para, mester tene cuidao pa e no cay. Boso no ta expone na ningun tentacion cu ta surpasá midi humano. Dios ta fiel. L’E no permiti pa haci prueba di forsa cu boso”. (1 Kor. 9:12-12)
Señor, den nos condicion di hende limita y pecador, nos tin mester di bo Spirito di fortaleza pa vence nos debilidadnan humano y nos picanan. Tende nos pidimento.
- Stashi - Nan ta kita Hesus su paña
Tur hende cu ta batiza den Cristo, ta hende nobo, pasobra nan a bisti nan mes cu Cristo.
San Pablo ta bisa nos: “Mi no tin nodi di recorda boso e obra di caridad di nos Señor Hesu-Cristo; con El a bira pober, mientras E tabata rico. I boso por a bira rico pa medio di su pobreza”. (2 Kor. 8:9)
Oh Señor, haci pa nos bisti e paña di hende nobo, ke men, como escohido nan santo y stima, cu compasion tierno, bondad, humildad, suavidad y pasenshi,
Soportando otro y pordonando otro, manera Bo mes a pordona nos. Pa medio di Cristo nos Señor.
- Stashi - Nan ta claba Hesus na Cruz
Cristo cu su sufrimento a hiba nos cerca Dios Tata y a duna nos bida nobo.
Den Evangelio di San Lucas nos ta lesa: “Ora nan a yega na un luga yama Karpachi, nan a clab’E riba cruz, mescos cu e malhechornan, un na man drechi, e otro na man robez. Y Hesus di: “Tata, pordona nan, pasobra nan no sa kico nan ta haci’. Nan a parti su paña cu otro, tirando douw”.
Señor, nos ta suplica Bo, duna nos e gracia di por pordona nos rumannan, manera Bo mes a pordona nos. Pa medio di Cristo nos Señor.
- Stashi -
Hesus ta muri na Cruz
Hesus a duna su bida manera ofrenda, pa nos por keda liber di pica.
San Lucas ta bisa: “Tabata awor banda di e ora di seis; scuridad a tapa henter e region te cu e ora di nuebe, como solo no tabata duna claridad mas. Cortina di tempel a parti meymey na dos. Anto Hesus a sclama na bos halto: Tata, den bo man Mi ta entrega mi spirito”. (Lukas 23:44-46a)
Dios, Dios Todopoderoso, yuda nos comprende cu, manera morto di bo Yiu tabata un entrega na Bo, pa nos haya salbacion, asina nos tambe por sigui su ehempel. Pa medio di Cristo nos Señor.
- Stashi - Nan ta kita curpa di Hesus for di na Cruz
Den Cristo su morto Dios a cera un alianza nobo cu nos, y den djE nos a haya
caminda di salbacion.
Hesus ta bisa nos: “Esun cu stima su bida ta perde; ma esun cu ta odia su bida den e mundo aki lo tine pa bida eterno. Si un hende ke sirbi Mi, anto e mester sigui Mi; caminda Mi ta, ey mi sirbido tambe lo ta. Si un hende ta sirbi Mi, Tata lo honre”.
Oh Dios, nos Tata, cu su morto Cristo bo Yiu a vence morto y pica, duna nos e gracia di por yega na fuente di awanan di bida y salbacion. Pa medio di Cristo nos Señor.
- Stashi - Nan ta dera curpa di Hesus
“Pasobra akinan nos no tin un stad permanente, Hesus a siña nos busca esun
benidero. Pa Cristo su resureccion nos a haya un rayo di speranza, cu nos tambe
lo resucita kun’E. Y maske ley di morto ta haci nos bira tristo, e promesa di inmortalidad ta yena nos cu consuelo.
“Pasobra pa esnan cu ta kere den Cristo bida no ta caba, sino ta transforma”. (Misa di difunto).
Oh Señor, nos ta spera cu aya den Bo Reino, nos tur hunto por goza di plenitud di bo Gloria, dia cu lo Bo seca tur lagrima for nos cara. E ora ey nos lo mira Bo, nos Dios, manera Bo ta, pa cana Bo Gloria den tur eternidad.
- Stashi - HesuCristo a resucita
Hesus a cana e caminda di Cruz te na morto. Despues di tres dia El a resucita. Hunto cu Cristo, nos tin cu carga nos Cruz y cana nos caminda di bida. Cristo su resureccion ta siña nos cu nos mester lanta fo’i graf di nos pica y mal costumbernan.
Hesus a resucita y ta keda bibo meymey di nos. Como seguidornan di Cristo nos mester proclama e berdad di su resureccion y refleha su presencia den nos bida di tur dia.
Oh Dios nos Tata, Bo a laga Bo Yu Hesus lanta for di morto. Duna nos e gracia di por lanta for di nos bida di pica y maldad, pa nos tambe por goza e Gloria di nos resureccion pa tur eternidad, hunto cu Cristo nos Señor.
ORACION FINAL:
Cu curazon contento laga nos duna gracia Dios nos Tata, cu a laga nos participa den Cristo su morto, pa asina nos lo participa den Su resureccion tambe.
San Pedro ta bisa: “Bendiciona ta Dios, Tata di nos Señor Hesu-Cristo. Den su gran misericordia El a laga nos renacé den un bida yen di speranza. El a haci esaki pa medio di resureccion di Cristo. Asina aki lo tin un herencia cu lo no termina nunca. Y cu ta keda reserva pa nos den cielo. Pasobra Dios a tuma nos bou di su proteccion poderoso. E ke guia nos riba caminda di fe pa nos haya e salbacion cu E tin reserva pa nos y cu l’E revela na fin di tempo”. (1 Pedro 1:3-5).
Na nomber di Tata, di yiu, y di Spirito Santo. AMEN.
