ORANJESTAD (AAN): E organizacion local di ‘Democracy Watch Aruba’, cu ta cay bao di Rainbow Warrior Core Foundation,
a bati alarma ora cu nan ta sinti cu Gobierno di Aruba ta menazando di cera radio emisora y introduci un mediaraad, codigo di conducta pa ‘comunicacion social responsable, time-delay broadcasting, y otro medida pa limita libertad di expresion riba e isla.
Esey ta loke Milton E. Ponson Jr. di Rainbow Warriors Core Foundation a indica.
Segun Ponson, tabata 23 di December 2021 cu dos medio di comunicacion a ricibi advertencia pisa di Ministro di Comunicacion, Geoffrey Wever, kende por cierto ta un abogado, informando nan cu e entrevistanan sosteni cu un polemico politico di partido Pueblo Prome tabata inacceptable, pasobra nan supuestamente tabata contene menaza directo y indirecto contra Prome Ministro di Aruba.
Central den e dos entrevistanan aki ta e declaracionnan tocante un confrontacion y intercambio fisico entre dos persona (yiu di politico di Pueblo Prome, y yiu di Prome Ministro di Aruba) den un establecimento nocturno na Palm Beach, cu a conduci na intercambio fisico di agresion y algun otro hende sosteniendo leve herida.
E politico a papia den un entrevista, y aki a e.o. papia fuerte riba Prome Ministro, yamando su persona y su famia pa cobarde door di laga autoridadnan detene su yiu homber pero no e yiu homber di Prome Ministro mes, cual yiu homber segun testigonan y esnan presente na e lugar tabata igualmente responsabel pa e cadena di evento cu a tuma lugar, y hasta por a ser considera e "agent provocateur".
Segun Ponson, Gobierno di Aruba ultimamente ta confrontando oposicion pisa di sindicatonan publico pa via di e corte di 12.6% riba salario, prensa local y criticonan den sociedad civil tocante e contracto firma cu Eagle LNG Partners, tapa cu un nondisclosure agreement, un escandalo emergente envolviendo posiblemente miles di vaccination passports falsifica na Aruba y varios otro tema cayente.
Den opinion di Democracy Watch Aruba y Corruption Watch Aruba, dos programa special di Rainbow Warriors Core Foundation, Gobierno di Aruba ta usando e dos entrevista como un pretexto legal pa utiliza tactica pa spanta publico y medionan di comunicacion, y haci menaza pa cera radioemisora y medionan criticando Gobierno di Aruba, pa introduci un mediaraad, time delay broadcasting, un codigo di conducta pa "comunicacion social responsabel" y pa directamente limita libertad di expresion na Aruba.
Gobierno di Aruba, e coalicion di partidonan Movimiento Electoral di Pueblo y RAIZ, a pone integridad y transparencia como dos punto central den nan programa di gobernacion.
Aruba, un pais autonomo den Reino Hulandes, semper na vanguardia di libertad di expresion y prensa, awor ta bao menaza, ya cu e Ministro di Comunicacion abiertamente a adverti cu lo bin cu medidanan restrictivo pa medionan di comunicacion, pues pa libertad di expresion en general.
Rainbow Warriors Core Foundation, registra cu UN NGO Liaison Office como un international NGO under Dutch Kingdom law, cu alcance global, ta severamente condena e cartanan saca pa Minister Geoffrey Wever y e obvio intencion di Gobierno pa restringi libertad di expresion y introduci censura imponi door di Gobierno na Aruba.
Aruba actualmente ta testigo di reapertura di e "cold case " di e asesinato di e periodista investigativo Poentje Castro mas di un decada pasa, den cual caso varios persona a ser indica como persona di interes y sospechoso, y den cual caso un persona como sospechoso a presenta caba dilanti huez, y contra cual lo cuminza un caso penal na 2022.
Rainbow Warriors Core Foundation ta urgi Tweede Kamer y Conseho di Ministronan di Reino pa invoca articulo 43 di Statuut pa garantiza y salvaguardia derechonan civil y libertadnan na Aruba y cumpli cu tratadonan internacional pa cu e derechonan di libertad di expresion y libertad di prensa.
