DOW a bay corta yerba creciendo di mas na Lago Heights Park

ORANJESTAD (AAN): Bo ta mira algun caminda unda tin di pasa y ranca yerba, of corta mata cu ta bay demasiado riba caminda publico.

  Djis corda cu awor DOW tin un website, unda tur ciudadano por acudi pa asina yena un formulario for di comfort di bo cas of oficina.

   E formulario cu e peticion aki ta wordo registra na DOW, y ta ser poni riba nan planning pa manda un ploeg eynan pa asina haci e trabao.  E website pa esaki ta:

www.dow.aw

   Aki lo bo haya e opcion di “formulieren”, y ta escoge esey.  Asina bo ta haya e “Formulier Klachten”, pa asina keha si acaso bo ta hala atencion riba problema cu acera, of rand di caminda.  Of ta indica problema na un caminda di asfalt, caminda di santo, of si tin hende ta construyendo sin permiso, of tin problema cu luz di caya, mata y vegetacion pues yerba, of molester di awa, y mucho mas.

   Djis yena e informacion riba loke ta pasando, menciona e lugar unda tin problema, y bo por hasta agrega potret.  Despues sigui cu e punto di ‘Ga verder’ pa bo sigui.

   Aki por mira recien con ciudadanonan a keha riba yerba cu tin den Lago Heights Park.  DOW ta gradici comunidad cu a manda avisa di e problemanan aki via nan Website, y nan departamento di Landschapbeheer mesora a acudi eynan y a cuminsa drecha e parke.  DIARIO a compronde cu nan lo sigui henter siman na Lago Heights Park.

   Bo bario tambe tin demasiado yerba of mata ta bay den caminda, subi nan website y raporta esaki.