Richenel Stamper a duna di conoce:
ORANJESTAD (AAN) – Den entrevista cu DIARIO, señor Richenel Stamper, Funcionario di Departamento Progreso Laboral, a comenta cu DPL a drenta den un trayecto cu ta bay dura entre seis pa siete siman, cu ta considera un proyecto piloto, y cu a cuminza cu un grupo di hende muher.
E meta principal di e proyecto aki ta pa yuda e damanan aki subi e mercado laboral. “Nos tur sa cu pa subi e mercado laboral tin cierto exigencianan y tambe cierto retonan pa hopi hende awendia. Un di nan ta cu bo mester ta bon prepara prome cu bay un entrevista. Den cuadro di esey, DPL ta hunta un rol importante den e trayecto aki, caminda cu nos ta bay ta dunando les, tayer di trabao, na e grupo aki, pa asina prepara nan di adelanta pa nan por pasa door di un entrevista laboral cu exito”, Stamper a señala.
Esaki lo tuma lugar di seis pa siete siman largo, cuminzando prome cu e desaroyo personal di e damanan aki, pasobra hopi biaha tin dificultadnan personal cu ta stroba e persona pa por haya un trabao. “Pesey nos kier atende cu esaki debidamente, conhuntamente cu Departamento di Asunto Social, y tambe Centro pa Hoben y Famia; nos a uni pa bin cu e iniciativa aki pa bin cu un trayecto cu inicialmente ta pa hende muher, pero nos ta bay tin tambe den futuro cercano, oportunidad pa hende homber, y tambe pa gruponan mixto” Richenel a subraya.
El a reitera cu nan a inicia esaki como un proyecto piloto pa wak con e ta bay. “Nos a cuminza dialuna cu e proyecto, y mester bisa cu ta un grupo di mas of menos 15 persona ta participando na e proyecto aki y e reaccion ta hopi bon, hopi positivo, di cual nos ta premira tambe cu e siguiente trayecto di tayernan di trabao tambe ta bay ta exitoso”, Richenel a acentua.
Den futuro, e ta bay bira un parti strategico di DPL, kizas hunto cu e otro instancianan menciona. DPL ta bay haci esaki frecuentemente, p’asina yuda esnan cu tin dificultad of retonan pa por subi e mercado laboral pa nan por haya un oportunidad. Na final di e trayecto DPL lo organiza tambe diferente entrevista cu dunadornan di trabao.
“Na final di e trayecto e participantenan lo haya un certificado cu nan a pasa den un proceso di capacitacion loke tambe por pisa hopi pa nan por haya un trabao”, Richenel Stamper a señala.
Esaki ta cubri tur sector, dependiendo claro, di e experiencia y capacidadnan di e buscado di trabao, y tur esaki a wordo analiza caba, prome cu cuminza cu e proyecto. A selecta e personanan cu ta participa, a base di nan edad, capacitacion, y nan potencial.
