E buriconan aki tambe ya a bira un atraccion turistico

ORANJESTAD (AAN): E famoso buriconan di area di Boca Grandi y tambe Colony y Sero Colorado, keto bay ta cana rond.

   Un ciudadano cu DIARIO a topa cune ta hibando cuminda y baki di awa pa nan, a reclama na e fotografo cu te asina leu cu e sa, ainda no tin un instancia concerni, por a percura pa pone un baki grandi cu awa fresco pa e animalnan aki por haya pa bebe.

   E ta yuda te unda cu e por, pero tin biaha debi na su trabao di warda, e no ta haya chens.

   No mester lubida, cu e buriconan aki pa awor ya ta forma parti di e poco atraccion pa nos turistanan tin pariba di Brug, ora nan ta bay Baby Beach of Roger’s Beach.

   Mescos cu na Playa tin Flamingo Beach, e area aki di punta mas extremo di San Nicolas tin su buriconan cu ta warda tur dia pa haya un hapje di wortel of appel, pa yena stoma un poco.