ORANJESTAD (AAN): E fin di siman aki ta bay tuma lugar na Aruba e prome "Aruba Holistic Health 360",
cu a nace di e preocupacion di 3 terapeuta cu ta comparti nan maraviyoso experiencia den asistencia holistico.
Den entrevista cu DIARIO nan a splica cu nan a haya nan mes compartiendo e deseo di expande e conocimento tocante diferente metodologia, procedimento y programanan cu tin pa asisti e comunidad adecuadamente den e transicion di nan malesa of patologia pa un salud pleno, integral y feliz.
E meta di e evento ta pa presenta na tur hende cu ta biba na Aruba, e excelente disciplinanan terapeutico cu ta desaroya na e isla y e profesionalnan serio cu ya ta brindando esaki cu resultadonan impresionante.
Doris Lacle – Eugenio, Rossiel Colmenares y Patrizia Mosquera, ta terapeutanan den diferente disciplina holistico y nan a bin cu e idea di lansa e proyecto aki pa prome biaha y mas cu claro cu e obhetivo pa sigui cu ne den futuro.
E eventonan lo inicia diahuebs anochi di 7pm pa 9pm cu un presentacion tocante 'Alimentacion Inteligente'. Lo continua diabierna di 7pm pa 9pm cu e tema 'Sound Bath High Frecuency'. Y pa diasabra 4 di mei, for di 4pm pa 8pm lo tin e expo cu participacion di terapianan, exponentenan y charlanan interactivo.
E eventonan lo tuma lugar na MFA Paradera.
