Investigacion haci pa Studiante di Universidad
- Si acaso bo a haya menaza of sufri violencia of discriminacion
ORANJESTAD (AAN): E siman aki DIARIO a haya sa di un investigacion cu ta wordo haci na Aruba, riba sorpresanan cu e clase trahador ta topa cune, cu exigencianan, presion, y conflictonan den e mundo laboral riba e isla aki. Aruba tin varios industria cu scarcedad di trahador, kizas esaki lo por ta e causa cu hendenan no kier labora den cierto sector mas.
Tur esaki y mas ta loke a pone e studiante Charlene Wever, kende ta completando su Masters of Business Administration (MBA Program) na Universidad di Aruba traha riba esey.
“Pa mi Master's thesis, mi ta conduciendo un estudio tocante trabao,” Wever a bisa. Loke e ta referi aki ta e.o. exigencianan na trabao, y conflictonan na trabao cu ta topa cune na Aruba.
Loke e ta referi na dje na “conflictonan”, ta e.o. ora trahadornan ta haya menaza, of ta sufri abuso na trabao, ta topa cu momentonan di violencia, y hasta discriminacion y acoso (harassment), absentismo y e momentonan cu tin intencion di retiro di empleo na Aruba.
E mester di mas yudansa pa haya sa di trahadornan local kico ta pasando. Pues el a traha un encuesta online cu trahadornan na Aruba por participa na dje.
“Bo participacion ta valioso y aprecia,” Wever a bisa. Pero e ta pidi pa publico por fabor tuma nota cu bo mester ta emplea permanentemente na Aruba, y tin 18 aña bay ariba pa por participa na e encuesta aki.
E encuesta lo dura mas o menos 5 minuut pa completa, e ta completamente anonimo, y e resultadonan lo worde uza solamente pa e investigacion.
Pa haci e encuesta na Papiamento, bay na e website aki:
Sinembargo si acaso bo kier haci e encuesta na Ingles, e ora bay na e website aki:
Na final di e encuesta bo tin e opcion di duna bo e-mail adres pa participa pa gana un “gift card” di Super Food na balor di 250 Florin. E ganador lo worde contacta via di e-mail.
