ORANJESTAD (AAN): Entrante diamars dia 20 di april 2021 ta habri e posibilidad pa tur ciudadano di 50 aña of mas y tambe tur esnan cu anteriormente a perde
nan cita, pa “walk in” y vacuna. Tur ciudadano di 50 aña of mas cu a registra caba y no a haya un cita ainda por “walk in”.
Tambe tur ciudadano di 50 aña of mas cu ainda no a registra por “ walk in” y lo haya ayudo cu registracion y lo wordo vacuna tambe na mes momento. Ciudadanonan cu tabata tin un cita anteriormente y pa un of otro motibo a perde esaki tambe ta wordo encurasha pa “walk in” cuminsando diamars dia 20 di april for di dialuna pa diasabra na Centro Libertador Betico Croes for di 8:30 am pa 7:00 pm non stop of tambe na Teresita Center di dialuna pa diabierna di 8:30 am pa 11:30 am y di 1:30 pm pa 4:30 pm. E servicio di “Walk In “ ta unicamente pa aplicacion di e prome vacuna. Es cu ya tin e prome vacuna, mester acudi na su cita ya programa pa por haya su di dos.
Puntonan importante pa tene cuenta cu ne.
- Localidadnan di vacunacion ta unicamente Centro Libertador Betico Croes y Santa Teresita Center.
- Esnan cu tin un cita na Don Bosco Club, mester acudi na Centro Libertador Betico Croes mesun dia y orario segun cita.
- MFA Savaneta no ta yuda cu registracion
- MFA Santa Cruz ta sera pa registracion y lo bay duna asistencia na Centro Libertador Betico Croes cu registracion
- Ta permiti solamente 1 ayudante pa es cu tin mester di extra ayudo na e localidad di vacunacion.
- Pa haci bo proceso di registracion mas liher, registra via Aruba Health App of www.dvg.aw of www.arubacovid19.org of na MFA Paradera y Noord of tambe na Teresita Center.
