Fatima College cu hopi entusiasmo a ricibi Prome Minister

Relaciona cu Dia di Betico

ORANJESTAD (AAN): Diahuebs mainta 18 di januari, Prome Minister Evelyn Wever-Croes a cuminsa cu su bishitanan tradicional na varios scol en conexion cu Dia di Betico. Riba 25 di Januari, Aruba ta celebra e fecha natal di Gilberto François ‘Betico’ Croes.

   Durante varios aña caba, e dianan prome cu e gran celebracion, Prome Minister ta pasa bishita diferente scol y asina conta un tiki di e historia di Betico, su lucha, su bida y tur e sacrificionan cu el a haci pa nos dushi isla Aruba.

   Un di e scolnan cu Prome Minister a bishita riba e prome dia ta Fatima College na Dakota. Akinan e mandatario a worde ricibi cu hopi entusiasmo y a keda masha contento di wak con bunita e klasnan ta dorna pa e ocacion aki.

   Alumnonan di klas 4 y 5 a bin cu presentacionnan hopi interesante y nan a haci varios pregunta y tambe por a wak cu nan tabata bon prepara pa responde tur pregunta di nos Prome Minister. E mandatario a gradici cabesante y docentenan pa nan atencion cu nos muchanan en general pero specialmente cu e celebracion di Dia di Betico.

   Prome Minister a expresa cu e muchanan tabata sumamente encanta cu e tema aki y cu e a sinti un un emocion grandi di tende nan papia di e lucha y logronan di Betico y e importancia cu esaki tin pa nan mes. “Nos tur tin un Betico den nos y akinan mi a topa hopi cu den prome bista bo ta weita cu nan ta bay haci cosnan grandi pa Aruba.”