ORANJESTAD (AAN): Diaranson mainta a tuma luga un reunion entre representante di Ministerio di Husticia y Asuntonan Social Sra. Michella Steenvoorde – Laclé,
conhuntamente cu representantenan local y internacional di TUR COS TA POSIBEL, Sra. Angelique Wout, Mel Coward y e coordinadora di Formacion Social (Social Vorming Traject) Sra. Jessica Ras.
Voluntario di Inglatera Tom Holmes
Den dicho reunion SVT a cera conoci cu e boluntario di inglatera Sr. Tom Holmes kende lo tey pa tres luna y lo ta asistiendo diferente organisacion den nos comunidad deportivo na Aruba, incluyendo SVT.
Programa di boluntarionan comunitario.
Tambe e aña aki a yega na un acuerdo entre TUR COS TA POSIBEL y SVT kendenan lo ta bay host na maart 10 boluntario internacional y 5 boluntario local cu un programa di 2 siman di trabaonan boluntario riba tereno Social y Deportivo.
E boluntarionan internacional lo ta hospedando na un cas na Pos Chiquito, y di eynan nan lo wordo transporta pa nan actividad boluntario di dia.
Cuatro spot pa cursistanan di Formacion Social (SVT)
Durante e presentacion di TUR COS TA POSIBEL na Marinierskazerne diaranson, caminda nan a splica e integrantenan di Formacion Social nan actividadnan y e posibilidad pa inscribi como boluntario local.
Mesora tabata tin hopi entusiasmo pa tuma un di e 4 spotnan cu tin reserva pa integrantenan di Formacion Social pa asina ta un di e boluntarionan local. Sra. Jessica Ras, coordinadora di Formacion Social lo bay tin e dificil tarea pa selecta 4 for di tur esnan cu kier aplica.
Nos boluntarionan lo bay Inglatera
Si nos boluntarionan haci un bon papel nan lo tin chance pa bay 2 siman Inglatera na augustus caminda nan lo traha na un music festival na Leeds riba temanan di reciclahe y sostenibilidad. Tur e gastonan lo wordo cubri for di fondonan Europeo di e programa Erasmus+.
Sra Steenvoorde- Laclé ta agradece Stichting TUR COS TA POSIBEL pa e oportunidad brinda na nos hobennan di FORMACION SOCIAL, y ta desea nan hopi exito y suerte pa pasa e seleccion y pa nan tin un bon experiencia di intercambio internacional.
