ORANJESTAD (AAN) -- Minister Ursell Arends, Titular di Transporte, Medio Ambiente, Integridad y Asuntonan di Adulto Mayor, den conferencia di prensa di gobierno, Diahuebs 31 di Augustus,
a sigui expande den e tema di e Campaña Nacional di Desperdicio “Limpi Limpi”, cu ta cuminza Diasabra awo, 2 di September 2023.Tambe tabata presente como partner nobo na e Campaña aki, Gianaika van der Biezen di Fundacion Pa Nos Comunidad.
E mandatario a bisa cu siman pasa, dia 12 di Augustus, gobierno a lanza e continuacion di e campaña nacional di concientizacion pa loke ta trata maneho responsable di desperdicio, cu ya caba a inicia na comienzo di e aña aki, y manera a comunica e meta di e campaña aki, ta pa amplia e actividadnan cu ta duna forma na Aruba su balor y normanan, individual y cultural, encuanto maneho di desperdicio na Aruba.
Arends a bisa cu un di e actividadnan di e campaña Limpi Limpi, ta e esun di baki den bario, cu lo cuminza Diasabra awo dia 2 di September y lo core te mitad di December proximo, conhuntamente cu varios partner a lanza esaki, y ta colaborando tambe pa tene Aruba limpi.
Baki den bario ta un parti di separacion desperdicio cu ta di rotacion di distrito pa distrito. “Y un di e actividadnan primordial cu ta enfoca riba baki den bario, ta e separacion di desperdicio, y esaki ta unda nos ta pone enfasis tambe riba separacion pasobra nos ta cuminza inculca esaki den nos comunidad”, Minister Ursell Arends a subraya.
E mandatario ta contento di a constata cu e campaña aki a resona profundamente, y tambe cerca organizacionnan. “Na caminda pa un Aruba limpi, limpi y sostenible nos tin e placer awe di anuncia un colaborado nobo cu ta añadi un dimension excepcional pa loke ta trata e campaña aki mes. Un colaboracion cu no solamente ta amplifica nos mision, pero tambe ta yuda e comunidad di Aruba, directamente. Pesey mi ta sumamente orguyoso y contento di anuncia cu Fundacion pa Nos Comunidad ta uni su mes na e campaña nacional Limpi, Limpi y lo ta presente durante tur e actividadnan di baki den bario, pa asina aki yuda nos comunidad directamente tambe”, e mandatario a reitera y a pasa palabra pa Genaika van der Biezen, ken a elabora riba e rol di e fundacion den e campaña aki.
