Intercepta na Venezuela
PUERTO AYACUCHO: Via un servicio di Courier ricibi for di Medellin, autoridadnan na Venezuela a bin detecta cocaina liquido camufla riba Sombre tipico di Colombia.
E unidad Anti-Droga di Forza Armada Nacional Bolivariano cu ta controla tur cos na Aeropuerto Cacique Aramare cu ta na municipio Atures, cu ta duna servicio na Puerto Ayacucho, cu ta capital di estado Amazonas, ta esnan cu a detecta esaki.
Segun un boletin, un total di 498 sombre cu tabata poni den tres caha di carton, a yega via Courier eynan. Ora cu a haci test qumico, a bin descubri cu e cocaina a wordo inyecta na e rand di e sombrenan.
E mercancia di 48,3 kilo a sali di Medellin y su destino ta un adres na Caracas.
Riba e acto aki, e Hefe di Comando Strategico Operacional di Forza Armada Nacional Bolivariana a bisa: “Venezuela no mester di sombre Colombiano cu ta yena cu cocaina liquido, esaki ta un pueblo digno y sin vicio, y nos lo no bira nan ruta comercial”.
Den su boletin, e Hefe di Comando Strategico Operacional a hasta papia di 598 sombre contamina, cu ta 100 mas cu esnan cu e Unidad Anti-Droga a raporta.
