Francis Saladin di CUA: Pa crea eficiencia y efectividad
ORANJESTAD (AAN) — Den conferencia di prensa den cuadro di reunionnan cu lo mester conduci na formacion di gobierno nobo, Francis Saladin di Comerciantenan Uni Aruba (CUA), a sigui bisa cu e asunto di nombramento politico, tambe a bin dilanti den CUA su reunion cu Formador Evelyn Wever-Croes.
Esaki vooral mirando e reforma fiscal cu mester tuma lugar y tur e exigencianan cu ta bin di Hulanda, pa CUA ta hopi importante pa wak e personanan adecua den e departamentonan di gobierno, specialmente esnan cu tin di haber cu e parti di economia of comercio, pa por brinda un servicio optimal y asina stimula, crea eficiencia y efectividad den esaki.
UCA kier wak mas e desaroyo di digitalizacion. “Nos ta contento di wak tur e cambionan cu ya caba ta tumando lugar y cu tur instancia of departamentonan cu ya ta preparando digitalmente. Y nos ta wak esaki den Covid, door di e esfuerzonan haci anteriormente, hopi di e departamentonan aki manera SVb, Departamento di Impuesto, Economische Zaken, por a brinda un servicio mas facil y miho door di esaki y nos kier wak gobierno enfoca completamente riba esaki, pa sigui digitaliza e aparato y e departamentonan”, Saladin a trece dilanti.
E aspecto di participacion tambe tabata parti di e agenda di CUA den su reunion cu Formador. “Pa nos ta hopi importante pa gobierno inclui tur su partnernan, tur su stakeholders. Y no inclui nos na final, ora bo tin bo decision casi cla, sino inclui nos na cuminzamento. Nos tin hopi hende cu talento, disciplina, conocemento di materianan den nos sector priva, cu kier y por y ta dispuesto pa contribui gratuitamente. Ta jammer pa bo como gobierno no haci uso di dje, pasobra na final di dia ta haci e ‘draft craft’ mas fuerte. Pero no solamente esey, sino cu door di traha hunto bo ta crea confianza envez di desconfianza, y eigenlijk ta bira mas facil tambe pa bo haci bo cambionan, pasobra ya caba e ora ey bo tin e grupo ta trahando cu bo y ta mas facil pa yega na e solucionnan y decisionnan cu ta wordo carga door di bo representacion di comercio, pueblo, etc., den su totalidad. Esaki tambe ta algo cu nos ta boga pe y manera mi a bisa nos no tey pa bringa gobierno sino pa yuda gobierno, vooral mirando e retonan cu gobierno ta bay tin e añanan venidero, despues di Covid-19”, Francis Saladin a conclui.
