Eleccion presidencial Dominicano
- Urna electoral na Centro di Bario Playa Pabao
- Por vota for di 7:00 am te cu 5:00 pm
ORANJESTAD (AAN): Relaciona cu Eleccion Presidencial na Republica Dominicana cu ta tuma lugar Diadomingo awor, 19 Mei 2024, un suplica ta bay na tur residente Dominicano riba e isla aki, y kendenan tin derecho di voto, pa nan tey presente Diadomingo como cu for di 7:00 am te cu 5:00 pm, nan tin chens di deposita nan voto. Esaki lo bay ta na Centro di Bario Playa Pabao.
Esey ta loke Winston Tavarez, kende ta di Fundacion Dominicana Arubanse Juan Pablo Duarte a declara durante un conferencia di prensa. E ta pidi esnan cu ta traha trempan, pa busca chens di pasa deposita nan voto. Nan tin di presenta cu nan cedula electoral Dominicano pa por participa.
Esnan cu tin duda ainda si nan ta registra of no, nan por pasa na sede di e Fundacion e dianan aki na e sede Nieuwstraat 34-D na Playa, pa nan yuda check si acaso bo nomber ta aparece den e patron electoral.
Kende por vota? Esnan cu tin Paspoort Dominicano (aunke nan tin esun Hulandes tambe), y cu tin Cedula Dominicano, nan tin derecho di vota. Ora di vota bo tin di djis presenta cu e Cedula, sinembargo esaki mester ta registra na e Registro Electoral.
Esnan cu ta Registra, pero pa vota na Republica Dominicana y awor nan ta na Aruba y nunca a haci e cambio, lamentablemente nan no por vota Diadomingo awor.
Na Aruba tin un promedio di 2.400 persona Dominicano cu derecho pa voto pa Diadomingo awor, pues nan a registra y ta poni den e Registro Electoral oficial pa 19 di Mei venidero.
Cada votador lo ricibi 2 stembiljet pa bay vota, di cual uno ta pa nivel Presidencial, y e otro ta pa nivel di “Diputado de Ultramar” Despues tin di benta esakinan den e buzon corespondiente, y pa esaki tin di pone bon tino.
E persona cu ta vota, tin di marca un solo cruz (“X”) pa e candidato di su escogencia riba cada biyete. Cada stembiljet mester tin stempel y firma di e president di Urna Electoral. Ora cu votamento finalisa pa 5’or di atardi, lo cuminsa cu e conteo.
Sr. Tavarez di Fundacion ta haci un suplica cu despues di votamento, pa tur hende bay cas pa keda scucha of mira e conteo na cas. Pues ta pa evita cu hendenan ta keda aglomera na Centro di Bario Playa Pabao.
Na Aruba tin representante di e tres Partidonan Politico di mas grandi tambe cu ta hiba campaña pa e.o. Partido PRM, Partido PLD, y Partido Fuerza del Pueblo.
Pa nivel Presidencial, e votadornan tin 9 candidato pa escoge di dje. Nan ta e actual president Luis Abinader di Partido Revolucionario Moderno (PRM), sigui pa ex-president Leonel Fernández di Fuerza del Pueblo, y ex-alcalde di Santiago, Abel Martínez di Partido de la Liberación Dominicana (PLD).
Tambe tin Miguel Vargas di Partido Revolucionario Dominicano (PRD), Virginia Antares di Opción Democratica (OD), Carlos Peña di Generación de Servidores (GenS), Roque Espaillat di Partido Esperanza Democrática (PED), María Teresa Cabrera di Frente Amplio, y Fulgencio Severino di Movimiento Patria Para Todos (PPT).
