Tin hopi microplastic y chip di verf riba lama pabao di Aruba

Rapport final di diescuatro cientifico femenino cu a bishita Aruba na 2019 - ORANJESTAD (AAN): Caribe ta conoci mundialmente pa su bunita beach y lama claro y bunita. 

   Sinembargo e islanan y e area rond di dje ta contamina tambe cu plastico y otro fibranan traha pa humanidad, cu ta birando un potencial menaza pa futuro pa su bida marino y tambe e industria turistico, di cual e economia ta depende hopi.  E siman aki porfin e rapport a wordo emiti!  E ta indica cu e ta e prome evaluacion holistico di e contaminacion di plastico den Lama Caribe. 

   Lectornan di DIARIO por corda con un yate di bela cu abordo 14 cientifico femenino a yega Aruba riba Diabierna 6 di December 2019.  Esaki den cuadro di un bishita importante den investigacion di medio ambiente.  E velero SV TravelEdge a yega Aruba y mara na Pier banda di Wind Creek Seaport Casino despues di a bishita Antigua y tambe isla di Bonaire, riba e di Etapa 4 di eXXpedition Round the World.  Nan a recoge muestra di lama, y tambe for di fondo di lama y tambe na tera.

   Dilanti costa di cinco pais den Caribe, nan a identifica 18 diferente polymer di plastico, incluyendo fibranan sintetico, chips di verf y acrylico den lama tur rond di Caribe, cu mayoria concentracion (5.09 particula pa m3) net dilanti Islananan San Blas na Panama.

   En cambio, e awanan dilanti Antigua, Bonaire, y Colombia tabatin menor cantidad di plastico riba tera y den lama.  Antigua, particularmente a presenta un diversidad grandi di polymer, kizas debi na e fluho di Oceano Atlantico cu ta aglomera eynan.  E autornan di e estudio ta sugeri cu e sushedad na tera y microplastico haya den lama por ta consecuencia di industrianan maritimo y turistico.

   eXXpedition Round the World tabata un mision di investigacion cientifico pa studia microplastic den oceano cu un enfoque pa identifica solucionnan di polucion di plastico den oceano bek riba tera firme.  E 14 tripulantenan di eXXpedition Round the World cu ta abordo di e boto di bela, a forma parti di un  total di 300 muher multidisciplinario internacional den team di diez, y tin como meta pa crea un poderoso network global di embahadornan cu por usa nan experiencia di prome contacto riba lama pa implementa solucionnan back na tera firme.

   Ora cu e damanan aki no ta riba lama, nan ta forma parti di actividadnan di investigacion y tambe contact cu e comunidadnan na cada lugar cu nan bishita.  Na Aruba mes, nan a cana den Oranjestad pa haci un CAP (Circularity Assessment Protocol) y riba un caya a selecciona un superficie di 100 meter pa 1 meter, pa check cuanto sushedad tin riba dje.  Nan a nota cu cayanan na Oranjestad tin hopi glas kibra, straw di plastic, botternan di plastico, y tapadera.  Nan a hinca e data aki den e Marine Debris Tracker.

   Ora cu nan mester a bandona Aruba dia 13 di December 2019, nan mester a move di Playa pa Waf di Barcadera pa Inmigracion klaar nan uit.  Aki ta ora cu nan mester a pasa banda di e Dump di Parkietenbos y nan tur a keda sorprendi con sushi ta djis bay den lama cu djis un tiki supla di biento.  Tambe nan a dicidi stop eynan y manda un equipo bay recoge muestra for di fondo di lama eynan dilanti Parkietenbos. 

   Ora nan a kere cu nan lo haya djis santo den dje, e prome cos cu nan a saca ta un sefta di metal, y un pida waya electrico, esun fini cu ta wordo usa tin biaha pa pisca cune. 

   Nan ta mustra cu e Dump di Parkietenbos ta generando emision toxico y polucion di plastico ta leak den lama.  Y net eybanda nan a bin topa cu algun delfin cu a cuminza landa banda di nan.  Nan ta considera e Dump di Parkietenbos como algo cu lo molestia bida marino na Aruba, y ta pone plastico drenta e ‘food chain’.

   Pabao di Aruba rumbo pa Isla San Blas, nan a topa cu microplastico den lama, y tambe hopi chip di verf ta drief.

   E directora di e mision eXXpedition, Emily Penn a bisa: “Nos tabata emociona pa explora Antigua, Bonaire, y Aruba durante eXXpedition Round the World.  E islanan aki ta suministra e base perfecto pa nos considera e problemanan di contaminacion plastico na escala di e isla, loke ta refleha e problemanan na un escala global mas grandi.  Nos ta gradici tur nos siguidornan, principalmente nos patrocinador di e etapa aki, Red Ensign Group, y tur nos partnernan local.”

   E etapa aki ta permiti nan explora e beyeza di Caribe, pero tambe profundiza riba e problemanan local relaciona cu e derechonan marino y e contaminacion plastico.

   Durante e viahe, nan experto abordo lo facilita e recopilacion di datonan cientifico y e discusion encuanto e tema ambiental aki.

   EVENTO NA ARUBA:

   E cientificonan femenino aki a tene un encuentro cu publico durante un sesion sold-out na International School of Aruba den Wayaca Residence.  E muhernan aki ta tratando di concientiza pueblo riba e asunto di polucion di plastico y e variedad di solucion cu tin.  Esnan cu tabata abordo ta Sally Earthrowl (Britanico) cu ta e eXXpedition Mission Leader.  Tambe tin Anna Strang (Britanico) cu ta Skipper.  Maggie Kerr (Australiano) ta e First Mate.  Sophie Dingwall (Britanico) ta Deck Hand.

   Tambe tin Juliet D. Carvalhal (Aruba, Hulandes) cu ta Entrepreneur & Environmental Activist, fundador Impact Blue.  Julie Andersen (Merca) cu ta Executive Director Plastic Oceans International.  La Daana Kanhai (Trinidad) cu ta Marine Scientist.  Jamie Colman (Merca) kende ta Photographer & Marine Toxicologist.  Nathalie Moreu (Frances) kende ta Account Director.

   Tambe tin Liv Backhaus (Danes) cu ta Biologo Marino.  Marena Brinkhurst (Canades) cu ta Community Team Program Manager.  Rachel O’Callaghan (Britanico) cu ta Designer.  Sam Peltz (Merca) cu ta Producer/Host.  Emma Feggetter (Britanico) cu ta Technology Consultant.

  E rapport aki a wordo saca hunto cu University of Plymouth.