ORANJESTAD (AAN): Wardacosta di Caribe Hulandes ta informa doñonan di boto y tambe jetski of seadoo pa tene cuenta pa nan tin nan documentonan valido abordo cual ta, ‘vaarvergunning’ y ‘vaarbewijs’ di e capitan.
Percura pa tin vest di salbabida pa tur tripulante abordo; no por bay cu demasiado pasahero abordo di e boto pa evita situacion peligroso.
Importante tambe pa informa famia unda bo ta bay cu bo boto, pa na momento cu un situacion peligroso presenta, famia sa unda bo ta y asina por informa Wardacosta debidamente. Ta bon pa botonan tin un lifering y importante pa botonan tin nan anker cu suficiente cabuya abordo.
Wardacosta lo tey presente cu diferente di su botonan nan durante Semana Santa riba lama pa por haci e parti di vigilancia y brinda seguridad maritimo. Vigilancia riba cuido di naturalesa tambe ta parti di control di Wardacosta.
Areanan cu Wardacosta lo vigila ta San Nicolas baai, Commandeursbaai, Barcadera haven/ lagoen, Spaans Lagoen, Highrise Hotelnan, Arashi, Faro di California, Rincon, diferente Rif, Baby Beach y Eagle Beach.
Wardacosta ta avisa tur doño di boto pa laga haci mantencion na nan boto. Percura pa bo tin suficiente medionan di seguridad y ekipo di rescate abordo, tal manera: zwemvest, EHBO kit, suficiente awa, aparato pa paga candela, VHF marine radio of telefon celular cu bateria full carga. Asina por minimalisa e chens cu bo boto ta daña na caminda y cu bo haya bo den un situacion peligroso riba lama cu bo boto y bo pasaheronan.
Den caso cu bo mester di yudansa, bo por yama Wardacosta riba e number 913 of message riba WhatsApp +5999 510-0913
