Dos señora a keda pega ora vehiculo a bolter riba Avenida Nelson Oduber

ORANJESTAD (AAN): Diabierna anochi net un poco prome cu 9:30 pm, yamadanan a cuminsa drenta na Central di Polis

pa indica cu riba Avenida Nelson Oduber como 195 meter panort di rotonde cerca di Metro Mall, un auto a bolter y cu tin hende herida.

   Mesora Central a manda varios unidad di Polis rumbo pa e lugar, y aki tambe unidadnan di Polis motoriza a move pa eynan.

   E prome unidad di Polis cu a yega, a bin realisa cu no ta un auto, sino mas bien un vehiculo, esta un Compact SUV cu ta Hyundai Tucson cu number A-766 cu a keda cu su cuatro wielnan den halto, cerca di e matanan mey-mey di e dos vianan.  E accident ta net dilanti di Lava Aruba Glass Studio, un tiki panort di Taco Bell.

   Ora cu Polis a yega cerca, nan a bin ripara cu tin dos hende den e Hyundai pega, y nan no por sali.  Ambos ta dama y nan ta hendenan di edad.  Esaki ta suficiente motibo pa pidi Bomberonan acudi cu Vehiculo di Rescate eynan.

   Mientras tanto dos unidad di Ambulans tambe a yega, y Polisnan a cera trafico di e rotonde di Avenida Nelson Oduber bay panort.

   Polis a papia cu e señora tras di stuur, y el a splica cu el a bay pasa un otro auto, y aparentemente el a perde control y bay bolter meymey di e camindanan.

   Vehiculo di Rescate a yega, y a traha meticulosamente pa asina habri espacio pa cada uno di e heridonan por a sali. Paramediconan a atende nan mesora, y a hiba ambos pa Hospital.