Caso serio na Noord
ORANJESTAD (AAN): Diadomingo marduga banda di 3:45 am, un unidad di Polis di Noord a ser manda riba caminda net dilanti Kinderhuis Imeldahof como cu tin un homber eynan ta sangrando profusamente y e ta desea di ricibi asistencia medico.
Polis di Noord mesora a mobilisa pa e area, y na e Parada di Bus cu tin pabao di Misa, e agentenan a wordo yama door di un periodista, kende a bisa nan cu e homber cu tabata sangrando, a drenta un Isuzu pickup color shinishi y a core bay.
Polis a bay e direccion zuid y a logra yega tras di e Isuzu D-Max pickup, y a para esaki na altura di Bubali. Polis a nota cu e pasahero ta sangrando bastante, y tabatin varios bolombonchi riba su cabez, y varios herida chikito na su cabez y mannan.
E tabatin tambe un kap na e parti ariba di su braza robez, na su braza drechi ariba, y kap banda di su wenkbrauw drechi. Su shirt blanco cu e tabatin bisti ta tur na sanger. E tabatin un T-shirt y un faha tambe mara na su braza robez parti ariba, pa asina reduci e sangramento.
E victima di inicial Z. naci na Venezuela, a indica na Polis cu e tabata cu un amigo riba motorcycle, y cu nan a haya un accident banda di Kinderhuis Imeldahof. Segun Z., su amigo a bay lag’e atras eynan y a bay cu e motorcycle. Aki Z. a keda banda di e Parada di Bus te ora cu un ciudadano a pasa cu pickup, y a ofrece lift pa e bay Hospital. Pero Polis a sinti cu e homber ta manera spanta, y casi no kier papia.
Ambulans a yega eynan pa asina cuminsa trata y stabilisa Z. eynan mes. Via telefon, Polis a ricibi indicacion cu un testigo a mira con e homber aki a wordo hinca cu un obheto. Relaciona cu esaki, y mirando e hecho cu e heridanan di Z. no ta cuadra cu e storia di accident, Polis a pidi pa bay controla e area di Imeldahof y Misa di noord pa check si por tin un motorcycle y otro obheto cu lo por tin algo di haber cu e incidente aki. Polisnan a bolbe cuminsa papia cu Z. pa pone trankilisa y bise cu Polis kier sa kico realmente a socede. E biaha aki Z. tabata mas calmo y a cuminsa bisa cu el a haya pleito cu un grupo di persona banda di un Snacktruck Mexicano banda di Lekker Bar & Restaurant. Segun Z. a splica, cu e pleito aki a escala, y el a wordo asalta door di e grupo aki, y a wordo hinca cu un obheto di glas. Pesey Z. a core bay zuid direccion di e Parada di Bus, y busca yudansa.
E momento ey, Z. no kier a bisa Polis pakico el a haya pleito cu e grupo, y el a bisa cu e grupo di hende ta desconoci p’e.
Team forensico di BFTO tambe a yega pa haci investigacion. Recherche di Noord tambe a yega eynan, y a cuminsa haci un investigacion. Lo por bay check Security Camera den e area, y tambe di e Snacktruck pa mira kico exactamente a socede.
