Mesun grupo atrobe den e area
ORANJESTAD (AAN): Poco dia pasa caba DIARIO a publica con dos persona canando den marduga pa nan auto den e area conoci como Hot Zone, a wordo maltrata sin ningun motibo valido, door di un grupo di hoben cu tabata aglomera den area di parkinglot rond di McDonald’s.
Ta parce cu e hendenan aki ta haci esaki sea pa “pret” of ta haci esey pa un sorto di reto pa play grandi entre e otronan den e grupo.
Riba Diadomingo marduga, algo casi similar a bolbe socede. Tabata banda di 2:25 am, cu Central di Polis a manda unidad di Polis di Noord rumbo pa Kalibra Bar cu ta keda na South Beach, pa check un caso di asalto violento. Despues a haya informacion cu e victima a bay para te na Amore Mio.
E unidad di Polis cu a yega, a topa cu e victima di inicial L. Segun L. a declara, cu banda di 2:10 am e tabata canando banda di Kalibra Bar. Na su garganta e tin dos cadena di oro, cualnan e balor hunto ta yega na 5.000 Florin. Diripiente un hende a cuminsa ranca fuertemente na su cadena di oro. A resulta cu un persona desconoci a cana bin for di patras riba dje, y cu forza a rek na e cadena pa asina kibra y laga nan los.
Ora cu el a bira su cara, un otro homber a dal’e cu mokete den su boca. Su cadenanan finalmente a wordo ranca for di su garganta. El a mira un grupo di persona core bay, y pesey e no por a duna un descripcion di e delincuente specifico aki.
Pero e momento ey, e victima L. a mira un muher hoben, y un mucha homber tambe ta cana bay rapido. E conoce e dos personanan aki, como cu anteriormente e anochi ey el a mira nan dos ta cana hunto cu un grupo di hoben. E grupo a hasta haya un discusion, y por poco tabatin un pelea cu a start. E mucha homber ta bisti cu T-shirt cora cu cabey gevlecht. E muher hoben tabatin un blusa blanco.
Polis a pidi e victima pa hiba nan pa e lugar unda e asalto a socede. El a cuminsa cana y hiba nan na un pida pasiyo chikito entre Kalibra Bar y e kiosco Vadavas. E ta un hanchi chikito cu poco bista pa e publico/clientenan di Kalibra.
Ora cu e agentenan a yega eynan, Polis a mira dos homber cu shirt preto. Un di e hombernan tabatin un pida cadena di oro den su man, y cu e flashlight di su smartphone e tabata busca algo riba suela.
A resulta cu e hombernan aki ta Security. E cadena den su man a resulta di ta un pida di e cadena cu e victima tabatin na su garganta. El a kibra ora cu e delincuente a ranca esaki. Polis a puntra Security ta na unda nan el a haya e pida cadena. El a hiba Polisnan den area di e trapi cu ta subi pa bay Blossoms Restaurant cerca di South Beach Centre.
E security a entrega e pida cadena na e victima L. Polisnan a nota cu henter e area di Kalibra y South Beach Centre tin Security Camera.
Polisnan a dicidi pa duna e victima L. un lift pa su auto, mirando e circunstancianan. Na e momento cu Polis a cuminsa core pa bay su auto, e agentenan a mira un grupo di hoben mas pariba cerca di Brutto Restaurant. E victima L. a mira aki e mucha homber y e muher hoben, y a mustra Polis riba nan como e dos persona cu tabata cana prome cu e grupo. E mucha homber cu T-shirt cora, y e muher hoben cu blusa blanco.
A base di esaki, Polis a dicidi na bay para y papia cu e mucha homber, cu e momento ey ta para pabao di McDonald’s Palm Beach, contra e muraya di Aqua Grill. Polis a pidi e mucha homber pa haci su saconan di carson bashi. A controla tambe un tas cu e tabata cana cune. No a haya nada particular riba dje.
Polis a core rond di McDonald’s, y a bin topa cu un Honda Accord color di silver, cu portanan habri. Polis a mira e muher hoben cu blusa blanco sali for di e auto. Aki e victima L. a mustra cu esey ta e muher hoben. Polis a stop y papia cu e muher. Den e auto tambe tabatin un hoben sinta cu un cadena di oro rond di su garganta. El a wordo controla, y den un Tas cu e tabatin a bin haya un grinder di marihuana y un cuchiu di cushina. E dos obhetonan aki a wordo confisca.
Polisnan lo bay informa Recherche di Noord cu tur detaye di e caso serio di asalto aki. Cualkier persona cu por sa algo di e grupo di hoben aki cu ta slenter marduga den area di Palm Beach, por yama Tipline di Polis na 111-41.
