Partido AVP mes a haye ta drecha Parke di Lago Heights

Den un ehempel di union comunitario

ORANJESTAD (AAN): Simannan despues di a duna Gabinete Wever-Croes e oportunidad di haci algo pa comunidad di Esso Heights y bisindario, diadomingo ultimo a toca na e propio miembro, candidato y parlamentario di Partido di Pueblo Arubano AVP pa lora manga un biaha mas y tuma accion.

   Ta trata di e parke na subida di Lago Heights cu ta den asina un situacion di abandono, cu e hekinan di hero a frustia te cu bin abou. Poniendo schoudernan hunto, AVP a uni forsa cu ciudadano di San Nicolas pa haci varios reparacion na e parke pa elimina asina e peliger cu e falta di mantencion ta crea pa su usuarionan.

   E accion tabata lidera pa activista y prospecto pa candidato, Terrence Ras, kende ta un empresario local y a indica cu e trabaonan cu a realisa ayera ta muestra cu AVP no solamente tin un vision di innovacion pa Aruba, pero tambe ta un organizacion cu sa con pa kita bachi y traha na fabor di nos pais; sea den proyecto chikito of grandi.

   Ras ta spera cu e ehempel aki ta uno cu hobennan y henter comunidad por tuma, esta di uni forsa y ban traha hunto.