Artista local Rhoda Berg ta expone su obranan na Camara di Comercio

ORANJESTAD (AAN): Pa algun aña caba Camara di Comercio y Industria di Aruba (KvK) ta duna su espacio na nos artistanan local y brinda nan e oportunidad di expone nan bunita creaccionnan.

Arte ta bin di inspiracion y creaccion, y ta stimula y inspira otro tambe. E ta forma parti di e identidad di un persona, su cultura y pais. E biaha aki ta toca turno na señora Rhoda Berg pa expone su arte y alavez embeyece e murayanan den e area di recepcion di KvK.

   Diamars 8 di november pa 5’or di atardi KvK lo inaugura e exposicion oficialmente. Comunidad completo ta keda invita pa e inauguracion y. Ariba e dia di inauguracion por admira e obranan den bon ambiente hunto cu un bebida y algun pasaboca. E obranan lo keda colga pa publico por pasa admira nan durante un periodo di un aña. Aña pasa KvK a expone obranan di Fundacion Crea Arte, Señora Miriam de L’Isle.

  Rhoda Berg a nace riba 11 di april 1957 na Aruba. Despues di a traha dedica na e profesion di maestra pa mas cu 40 aña, Rhoda a baha cu pensioen na aña 2018.

Rhoda a discubri e arte di pintura durante e añanan trahando como maestra di scol y a dedica mas tempo na e arte aki despues di a baha cu pensioen y a sigui pinta y a cuminsa gusta e arte di pintura aki mas y mas y ta sigui dedica su mes na pinturanan riba canvas mas tanto.

   KvK ta gradici señora Rhoda Berg pa participa na KvK su exposicion di arte anual y expone su obra den e edificio di KvK. .