Parlamentario Alvin Molina (MEP):
ORANJESTAD (AAN): Parlamentario Alvin Molina a expresa cu ta berdaderamente hopi tristo, di basta tempo caba Hulp Bestuurskantoor San Nicolas ta den un estado deplorabel y servicio cu ta wordo duna na comunidad di San Nicolas ta hopi limita. Awo a yega asina leu cu e mester a wordo cera.
E ta compronde cu el a wordo cera paso ta toca un problematica di siguridad tanto pa e trahadonan y siguridad pe cliente. Ta hopi tristo y ta lamenta cu esaki mester a sosode. Di tur e MFA cu a wordo traha na Aruba, e edificio di San Nicolas ta un di nan cu mester a wordo traha prome. Tabatin un presupuesto disponibel pa tur 5 MFA y na final di dia net esun di San Nicolas no a wordo traha, door di un mal maneho.
Segun e parlamentario, na luna di april ultimo durante tratamento di e presupuesto 2022 el a entrega un mocion unda el a urgi gobierno pa duna atencion na Hulp Bestuurskantoor di San Nicolas, pa un dia e bira un MFA completo pa asina e pueblo di San Nicolas tambe ta mas cerca di cas pa cu Censo y Belasting.
Consecuencia di a cera di Hulp Bestuurskantoor ta cu un papel di 5 florin awo ta bay costa bo 10 florin, paso bo mester paga bus pa bay bin bek. Otro siman Parlamento di Aruba ta trata presupuesto 2023 y sigur mi lo trece mi mocion dilanti atrobe y puntra Gobierno kico ta e causa cu e Hulp Bestuurskantoor ta den estado deplorabel, no solamente e servicio tabata minimal pero cu a yega na e punto cu mester wordo cera. Mas importante pa sa kico ta bay ta e solucion y riba ki termino.
