Un voz nobo pa Salud Mental na Aruba
ORANJESTAD (AAN): E topico di Salud Mental ta un topico cu pa hopi aña a worde considera delicado aki na Aruba. Na 2020 ora cu e pandemia di Covid-19 a afecta e comunidad di Aruba tambe, conversacionnan cu antes tabata worde poni bou di un luz negativo, a bira conversacionnan cu tur ciudadano por a relata cu ne.
Tiki tiki, por a mira con e barrera pa papia tocante Salud Mental a cuminsa baha y awendia, nos por habri conversacionnan tocante Salud Mental un tiki mas facil.
El a crece na Aruba, Dr. Audrey Kan semper a desea di un dia por contribui back na su isla. Na edad di 7 aña, despues di e feyecimento inespera di su tata, Dr. Kan a ripara cu e tin un interes inmenso den psichologia. E experiencia di a mira con e y su ruman hombre gemelo, den e mesun cas cu e mesun reglanan, a procesa nan dolor riba maneranan asina diferente ta locual a lanta e chispa di curiosidad cerca Dr. Kan y no dura mucho pa e cuminsa cu su trayectoria educativo.
Despues di scol basico, Dr. Kan a sigui studia na Colegio Arubano y durante un vakantie grandi, cu edad di 15 aña, el a dicidi haci un Summer-School unda el a haci un curso di Business and Psychology. Despues di e curso aki, Dr. Kan a bin back Aruba cu mas curiosidad pa sigui amplia su estudio den psicologia.
Dos aña despues, cu edad di 17 aña, Dr. Kan a tuma e decision y paso grandi pa bay Philladelphia, Merca pa haci 4 aña di Bachelor. Despues di 4 aña na Merca, Dr. Kan a dicidi pa bay sigui studia na Hulanda pa e por logra su Masters.
Durante su estudio na Hulanda, Dr. Kan a siña hopi na momento cu el a haci su stage na Slotervaart Ziekenhuis na Amsterdam pero tabata sinti e necesidad di sigui amplia su conocimento. Despues di Hulanda, Dr. Kan a sigui amplia su conocimento den psicologia y a bay Washington, D.C.pa e cumpli cu su programa di Doctorado.
Durante añanan aki, Dr. Kan a ricibi un experiencia completo unda el a haya experiencia den tratamento di tur pashent (all patient treatment), un hospital psiquiatrico, departamentonan di gobierno y den un consulta priva.
Awendia, Dr. Kan ta un psicologo clinico cu expertisio den diagnostica, evaluacion y tratamento di problemanan psicológico. Como psicologo, Dr. Kan tin un estilo unico, colaborativo, interactivo, empatico y sin preyiucio. Pa Dr. Kan, psicoterapia ta un vehiculo pa e crecemento y cambio unda e proceso mester worde adapta na e necesidadnan di cada individuo.
Apesar di adapta e proceso na cada individuo, Dr. Kan ta specialisa den e prome episodio di psicosis cu usualmente ta pasa entre e edad di 13~25 aña, muchanan cuminsando cu edad di 6 luna, evaluación psychiatrico y victimanan di violencia domestico, trauma y servicionan forensico. Cu mas di 9 aña di experiencia trahando cu diferente poblacion na Merca, Dr. Kan a dicidi na 2022 cu ta ora pa e regresa su cas, cu e meta pa yuda nos comunidad logra biba nan ‘one happy life’.
