ORANJESTAD (AAN): Manera DIARIO a trece dilanti caba, durante e conferencia di trabao “Exito di estudio di studiante Caribense”,
cu a tuma luga siman pasa na Universidad di Aruba, a bini cu un pakete ambicioso di medida concreto y structural pa aumenta exito di estudio di e studiante Caribense ora e bay sigui scol avanza na Hulanda.
Asina aa presenta e resultadonan di e conferencia bao di e nomber nobo 'Aliansa Strategico pa Educashon (SEA)' na e siguiente ministeriele Vierlandenoverleg Onderwijs, Cultuur en Wetenschap (Consulta Ministerial di cuater pais tocante Educacion, Cultura y Ciencia).
SEA ta forma pa representante di pais Aruba, Hulanda Caribense (Bonaire, Saba, St. Eustatius), Curaçao, St. Maarten y Hulanda y e partidonan di educacion di e paisnan aki. Nan tin un aña y mey ta traha caba pa mehora exito di estudio di e studiantenan Caribense. Un gran parti di e studiantenan aki no ta completa nan estudio den exterior. A organiza e conferencia di trabao na Aruba pa desaroya e proximo pasonan concreto.
Varios medida concreto y structural: E subtitulo di SEA ta ‘A bright future for Caribbean Students’, un futuro briyante pa e studiantenan di Caribe. Pa haci e futuro aki posibel, un plan strategico conhunto ta necesario, cu ta fortalece e infrastructura educativo pa educacion mas halto y secundario den Caribe.
Ademas, un programa di mobilidad conhunto mester haci mobilidad den Reino na nivel mbo, hbo y WO posibel, y SEA ke prepara e studiantenan na e islanan mihor pa nan escogencia di estudio. E parti ultimo SEA ke haci door di ofrece un Pre-Academic Year (Aña Pre-Academico), pero tambe door di uso di medio moderno, manera app y goggles special di VR (virtual reality). Tur e recomendacionnan aki por topa back den www.strategiceducationalliance.org.
Cooperacion a largo plaso ta importante: Segun SEA, un acercamento structural y mehoramento di exito di estudio di e studiantenan Caribense ta rekeri un compromiso y partisipacion di tur partido, cu lo dura algun aña. Ta p’esei SEA lo pidi na vierlandenoverleg pa discuti y ratifica e compromiso multianual aki y existencia di SEA.
Tambe SEA lo pidi e ministernan involucra di vierlandenoverleg Educacion, Cultura y Ciencia pa percura pa apoyo financiero y recurso y pa garantiza cu ta realisa e acuerdonan haci.
