Ley di Raad van Advies a worde acepta unanimamente den Parlamento

Prome Ministro satisfecho

*RvA lo tin e responsabilidad pa apunta nan mesun miembro y presidentenan 

ORANJESTAD (AAN): Diaranson mainta Parlamento a trata e ley di independisacion di Raad van Advies. Esaki tabata un proposicion desde inicio di Gobierno di Gabinete Wever-Croes I na 2017.

   Na comienso di 2018, Prome Minister Evelyn Wever-Croes a institui un comision “Comissie Versterking Democratisch Bestel”, cu tin como tarea pa traha na fortifica e colegionan halto di estado manera Raad van Advies, Algemene Rekenkamer, Parlamento y Ombudsman.

                E comision a cuminsa cu e trabaonan y a bin cu recomendacionnan con pa independisa Raad van Advies un poco mas. Diaranson mainta a trata e ley aki den Parlamento, cu a worde acepta unanimamente.

   Cu aceptacion di e ley aki, Raad van Advies lo tin e responsabilidad pa apunta nan mesun miembro y presidentenan. Prome cu esaki, Gobierno por a hunga un rol den e decisionnan cu ta worde tuma, pero cu e cambio di ley, tur decision ta casi completamente den man di Raad van Advies y Gobierno su rol ta netamente pa ehecuta e decisionnan haci pa e colegio di estado aki. 

   Na momento cu Gabinete Wever-Croes a drenta Gobierno, tabata tin un debate grandi, no solamente financieramente pero tambe pa loke ta e fundeshi di nos democracia y estado di derecho. E tempo ey Gobierno a nota cu Algemene Rekenkamer y Raad van Advies tabata falta miembronan den e raad cu consecuencia cu rapportnan no por a worde emiti. Un di e rapportnan tabata di e investigacion intenso pa loke ta trata e 6 miljard Florin cu a bay den e plan di Bo Aruba, bou gobernacion di Gabinete Eman.

   “Esaki tabata un manera di por manipula pa stroba e colegionan halto di estado pa funciona. Si e colegio di estadonan halto no funciona, Aruba no lo tin e check and balances cu mester y ta pa e motibo aki Gabinete Wever-Croes a tuma e decision pa cambia esaki pa asina laga Aruba cu un sistema democratico fuerte na unda tin check and balances”. Prome Minister a duna di conoce.

  Prome Minister a enfatisa cu pa medio di e cambio aki, tur e colegionan di estado halto lo tin e forsa y capacidad pa controla Gobierno debidamente. “Ya e ora na momento cu mi sali di politica mi por tin un consenshi trankil cu mi sa cu tur e colegionan aki ta den funcionamento, ta tene Gobierno bou control y cu tin check and balances.”

  Gobierno a cuminsa cu Raad van Advies y lo sigui cu Algemene Rekenkamer. Pa loke ta trata e ombudsman, e ley a pasa caba y awor mester ehecute pa Aruba haya su defensor di pueblo. Despues lo sigui cu Parlamento, na unda aworaki nan mes ta trahando riba e concepto y cambionan cu ta worde proponi pa despues bin cu un ley tambe.

  “Awe sigur ta un dia importante pa Raad van Advies y pa Gabinete Wever-Croes cu semper a desea pa bin cu e ley aki, pero principalmente pa henter e democracia di Aruba”, Prome Minister Evelyn Wever-Croes a termina bisando.