Minister Endy Croes cu 'update' encuanto proceso di renovacion di St. Aloysius Scol

ORANJESTAD (AAN) – Minister di Enseñanza y Deporte, Endy Croes, a haci un bishita di cortesia na Scol Sint Aloysius,

despues cu na Mei a informa oficialmente, cu renovacion di e scol lo tuma lugar. E dignatario a duna un update encuanto e proceso di renovacion di e scol.

E mandatario a bishita e proyecto pa wak kico tur ta tumando lugar y a expresa cu berdaderamente a mira avancenan grandi di e banda noord.

E mandatario a duna di conoce cu 12 klas lo wordo completamente renova y moderniza, ademas cu nan a cambia full e dak, cual ta casi cla.

Tambe e kantoornan y biblioteca ta den pleno renovacion, y por a mira un pos completamente nobo cu ta wordo traha ultramoderno, y den e skina banda pabao nan a basha e bañonan existente y nan lo wordo poni den otro lugar y den full e skina banda pabao lo bin e gymzaal. Minister Croes a expresa cu e ta hopi contento cu e proceso aki.

Ademas, el a papia cu esnan encarga cu e contrato y nan a bisa cu nan ta segun e tempo y na November e proyecto lo wordo entrega.

Pa e parti di e speelplaats, cu semper tabata tin un problema di desague ora cu tin yobida awa ta para eynan, tin combersacionnan cu Departamento di Obranan Publico, pa den cierto momento DOW drenta pa cubri henter e speelplaats y lo traha esaki completo; nan lo traha e desague na un banda y lo conect'e na un rooi.

E dignatario ta spera cu e aña aki mes Sint Aloysius Scol lo wordo entrega completamente renova, y e ora y mester coordina e traspaso pa e cabesante di scol y asina docente y alumnonan por bin bek na nan cas original. E mandatario ta contento y na spera cu nan por entrega un bunita trabao.