AVB a celebra su Award Night 2021-2022 Diabierna den Cas di Cultura

ORANJESTAD (AAN) — Diabierna anochi, den Cas di Cultura, a tuma lugar e asina yama “AVB Award Night” pa e periodo 2021-2022.

Señor Randolph Lacle, Presidente di AVB, cu na prome lugar a yama bon  bini na Parlamentario Shailiny Tromp-Lee, presidente di e Comision di Deporte, na e bestuur di e federacion, y na tur e deportistanan talentoso cu a ricibi nan trofeo.

Manera ta conoci AVB ta cumpliendo 90 aña di existencia e aña aki, pero e federacion no ta cumpli e añanan aki door di su mes so, pero tambe danki na e trabao grandi cu hopi di esnan presente, of otronan cu tabata na cas, a haci dia aden, di afo, hopi biaha boluntariamente.

Señor Lacle a bisa cu AVB no ta solamente e, como federacion, pero ta consisti di tur su miembronan cu mester a reconoce tambe, pasobra nan ta forma un parti esencial di Arubaanse Voetbal Bond su 90 aña.

El a menciona cu cuatro grupo di AVB a drenta den e Platinum di Arubaanse Voetbal Bond como reconocemento pa nan trayectoria, nan añanan di existencia y nan trabaonan na bienestar di futbol. Esaki lo bira un tradicion pa AVB tur aña, durante e Award Night pa engrandece e ‘good members’ dunando e reconocemento na tur e boluntarionan cu ta traha cu alma y cuerpo pa e futbol di Aruba. El a gradici di curazon e cuater clubnan cu a drenta den Platinum di AVB y a expresa cu e ta conta den futuro cu nan cooperacion.

Lacle a subraya cu 90 aña ta hopi y nan kier haci algo, tin hopi historia y logronan grandi locual ta haci cu nan mester cuminza documenta nan. AVB tin Comision Historia y Documentacion cu ta trahando hopi duro pa asina tur e documentacion aki sali afo. Di e Comision aki tambe a nace e idea pa nan presenta un documental. Un segmento di e documental a wordo pasa den e anochi di reconocemento aki. E actividad a culmina cu un tremendo concierto di dos ora.