Mo-B Lab ta bek riba caminda

Premier Evelyn Wever - Croes:

ORANJESTAD (AAN): Un di e proyectonan di innovacion cu Gabinete Wever-Croes ta sumamente orguyoso di dje, for di su principio na 2018, ta riba caminda bek desde comienso di september 2022. Mo-B Lab ta un Bibliobus cu a wordo converti y transforma den un bus sostenibel, ekipa cu tecnologia, material, y actividadnan cu por stimula innovacion, y un mentalidad pa explora y fabrica. Mo-B Lab un biaha mas ta pasando den diferente distrito durante e aña escolar aki, pa asina scolnan por haci nan bishita. Actualmente Mo-B Lab ta den distrito di Noord, despues di un luna hopi exitoso den e distrito di Paradera.

   Pa Gabinete Wever-Croes innovacion ta hopi importante, pasobra ta a traves di innovacion, y cu diferente tools, nos lo prepara e siguiente generacion di studiante pa bay traha den futuro, trabaonan cu awe no ta existi ainda.  Ta hopi importante pa prepara y stimula e muchanan di chikito pa scoge e direccion aki, desaroya un mentalidad innovativo, ya cu hopi di e trabaonan den futuro lo rekeri conocimento den e areanan di ciencia, tecnologia, ingenieria y matematica. Y esakinan ta e topiconan central pa Mo-B Lab.

   Prome Minister Evelyn Wever-Croes ta manda un invitacion na tur e scolnan den Noord pa haci un cita y hiba e  klasnan bishita e Mo-B Lab, na unda e muchanan lo pasa un experiencia unico cu por yuda nan tambe cu nan tareanan na scol. E muchanan lo tin e oportunidad di explora tur e materialnan cu tin di tecnologia, coding, 3D Printing, diseño, y hopi mas. E proyecto aki un biaha mas no por ta posibel sin un gran esfuerso di colaboracion cu e partner nan principal cu ta: Aruba Futura Foundation, Brenchie's Lab, Prins Bernhard Cultuurfonds Caribisch Gebied, y Biblioteca Nacional di Aruba.

   “Ta hunto nos por percura pa prepara nos muchanan mas miho posibel pa tur loke ta spera nan den futuro”, Prome Minister a expresa.