Women's Club of Aruba a uni forsa cu GFWC pa Dia Nacional di Servicio 2023

ORANJESTAD (AAN): Cu orguyo Women's Club of Aruba (WCA) ta mantene su afiliacion cu General Federacion of Women's Clubs (GFWC) desde 1937.

E aña aki, GFWC a scoge 30 di september 2023, como Dia Nacional di Servicio (National Day of Service/NDS).

            E Dia Nacional di Servicio ta un ocasion di suma importancia ora cu GFWC ta uni su 60.000 miembronan di e 700 clubnan afilia na Merca y den mas di 20 pais, den un esfuerso colectivo pa yuda aumenta conciencia publico tocante cuminda y inseguridad alimenticio y pa provee recursonan di cuminda pa residente- y famianan den nan comunidadnan.

            WCA den alineacion cu e causa noble aki, a scoge pa enfoca su esfuerso riba Fundacion Pa Nos Comunidad: FPNC Aruba, e Banco di Cuminda oficial na Aruba. E mision di FPNC ta pa evita y lucha contra pobresa, angus􀆟a emocional y exclusion social y ta promove participacion, cuido di pobresa y bienestar general na Aruba. Desde 2009, e Banco di Cuminda ta brinda sosten crucial na mas o menos 150-200 famia Arubano cada luna, yegando anualmente na alrededor di 2.000 famia. E logro increibel aki a bira posibel door di e contribucionnan financiero generoso di individuo-, bienhechor- y organisacionnan.

            Presidente di WCA, Reina Geerman, a tuma e iniciativa pa contact FPNC, expresando e deseo fuerte di WCA pa haci un contribucion significante. Tambe el a compromete su mes pa ta boluntario pa un dia, participando activamente den preparacion di e bakinan di cuminda cu lo wordo distribui na e famianan den necesidad.

            Mientras cu e fecha oficial di NDS ta 30 di september, un grupo di boluntario di WCA a yega na FPNC na Modanza riba e diasabra anterior, esta 23 di september, e dia cu e fundacion a fiha pa distribui e bakinan pa luna di september. Tambe WCA a presenta FPNC cu un donacion di productonan esencial seco y den bleki, donacion generoso di e miembronan di WCA.

E boluntarionan a ricibi un bonbini for di e team di FPNC, cu a duna nan un bista detaya di e fuentenan di fondo di e fundacion y e proceso meticuloso di ensambla y distribui e bakinan di cuminda vital cada luna. Yena cu entusiasmo, e miembronan di WCA a traha duro pa varios ora, colaborando estrechamente cu e boluntarionan di FPNC pa prepara e bakinan y duna un bonbini na e famianan cu a bin pa recoge nan provicion mensual.

            Reflexionando riba e dia aki, cu gran satisfaccion Women's Club of Aruba por mira bek riba un contribucion significante na FPNC. Para hunto den compañerismo cu GFWC, celebrando nan impacto colectivo riba e Dia Nacional di Servicio di e aña aki.