Boto intercepta pazuid di Aruba cu 850 kilo di droga

Wardacosta cu accion riba lama

• Total di nuebe persona indocumenta a wordo deteni
• A usa avion y tambe helicopter den e proceso 

ORANJESTAD (AAN): Tabata Diabierna anochi, cu operadornan di Marine Radar a detecta movimento sospechoso di un obheto, esta un boto cu ta bin for di zuid y ta den direccion di Aruba.

   Mesora Centro MOC di Wardacosta di Caribe Hulandes a ser poni na altura, y nan a dicidi na manda e avion Dash-8 di Wardacosta, pa bay bula den e area pa verifica e contacto.  E avion aki tin ekiponan avansa cu por keda bula riba espacio aereo di Aruba, y toch di leu ta mira claramente hasta den anochi riba e botonan aki.

   Warda boto drenta Awa Teritorial: Esnan den e avion Dash-8, bulando basta halto pa por mira mas leu, cu e ekiponan sofistica a logra observa cu enberdad ta trata di un boto cu ta moviendo, y cu abordo por mira varios persona, y tambe diferente bulto.  Pero e momento ey ainda e boto no a drenta awanan teritorial di Aruba.

   Asina a sigui e movimento di e boto, y ora cu e boto tabata cuminsa drenta den awanan teritorial di Aruba, a laga dos boto di intercepcion rapido, esta Metal Shark sali rumbo pa e boto.  E biaha aki Helicopter tambe a bay ofrece sosten.

   E unidadnan aki di Wardacosta a yega rapido, y a bin topa cu un boto tipo Yola, color blauw, cu 2 outboard engine chikito, di cual uno ta di 50 HP.  Abordo a bin haya 9 persona indocumenta di nacionalidad venezolano.

   A resulta cu for di momento cu e tripulantenan a ripara cu Wardacosta ta den nan direccion, nan a core cuminsa benta tur e bultonan riba lama, pensando cu e acto ey lo bay converti nan den “inocente”.

   Piki tur bulto fo’i lama: Despues cu a aresta tripulantenan, unidad di Metal Shark a busca rond cu yudansa di Helicopter pa asina recupera tur e bultonan cu tabata drief den e area.

   Unavez cu esey a keda cla, nan a move cu e boto y tur hende rumbo pa e Pier di Wardacosta na Marinierskazerne Savaneta.  Aki Polisnan tambe a yega pa tuma e personanan aki.

   E bultonan aki tabata contene pakinan di cual algun ta marihuana, y otronan ta cocaina.  E peso a yega na 850 kilo di droga.  Tur esaki a wordo confisca, y Polis a bay cu nan y a laga destrui nan.

   E tripulantenan a wordo procesa y deteni, y e demas personanan indocumenta tambe a bay cu Polis, unda hunto cu Guarda Nos Costa lo sigui cu e investigacion, y despues nan deportacion bek pa nan pais.

   Aki ta mira cu Wardacosta di Caribe Hulandes ta sigui cuida e islanan aki, door di anticipa y confronta menazanan di seguridad y di contrabando, danki na nan experticio di ley maritimo y tambe cu aviacion, cu capacidadnan inovativo, y cooperacion estrecho cu diferente instancia na defensa di ley.