Razzia di Team Narcotica riba grupo meti den bendemento di droga

Accion di sorpresa na Madiki

• A detene un criminal peligroso kende apenas a sali di KIA 

ORANJESTAD (AAN): E investigacion tabata andando pa algun tempo caba, y esaki tabata wordo acompaña cu vigilancia y tambe acumula inteligencia riba loke ta pasa, y movimento di dealernan di droga cu ta move riba caya.

   Recien detencion di algun persona, a yuda den e informacion pa asina a yega un momento specifico riba Diasabra anochi, cu Team di Narcotica di Cuerpo Policial tabata sinti cu nan tin suficiente informacion, pa ehecuta algun razzia, y accion riba caya.  Esaki despues cu Ministerio Publico a duna luz berde.

   Pa haci esaki, nan a obtene asistencia di Team di Aresto, Flex Team, Unidad K-9, pa asina move direccion di Madiki y area di Socotoro.

   Di sorpresa e teamnan aki a yega na un cas na Panamastraat.  Mesun momento, na un distancia di como 300 meter mas leu, un otro team mas grandi a yega inespera den grupo grandi dilanti di e edificio cu te cu recien tabata BaraBar, y antes conoci como ex-United Dinner den Driemasterstraat.

   Grupo di 12 hoben: Na e banda panort di e edificio aki, pues den caya Venezuelastraat, e agentenan a topa cu un grupo grandi di hoben cu ta “chill” eynan, y como cu Polisnan a yega for di tur skina, nan no a haya chens mas di huy pa ningun caminda.  A pone como un docena di hende drumi abao na tera, y evita cu nan ta huy.   Despues uno pa uno, despues di a boei nan, a lanta nan di eybao y pone nan cara pa muraya di e edificio.  Algun a wordo poni pa keda eynan na rudia, mientras cu investigacion ta andando.

   Mesun momento a cuminsa busca tambe den algun auto para ey dilanti, incluyendo un Nissan March, y tambe un Nissan Sentra.

   Vocero di Polis a confirma cu aki a aresta varios persona como cu den nan poder a bin haya droga cu ta e.o. cocaina, cocaina base, marihuana, y tambe a haya municion.  Polisnan a check tambe un pida entrada di e edificio aki cu ta drenta via di El Salvadorstraat.  Pues autoridad a bolter delaster un piedra pa wak bao di nan.  Como cu hopi biaha dealernan ta usa un “area eybanda” pa warda nan ‘stash di droga’.

   Razzia na un cas: Mientras tanto na e cas den Panamastraat tambe a haya cocaina y marihuana na cantidad warda.  Tur esaki a wordo documenta y confisca.  Diferente persona a keda aresta.

   Den e accion aki, Polis a detene un criminal peligroso cu recien a bandona Prison di KIA, y un biaha mas a haye den badabada aki.  Ta trata di e homber F. di 32 aña.  E tambe tabata banda di ex-BaraBar.  A busca un Vehiculo di Transporte special pa hibe na un otro Warda di Polis.

   No ta tur hende eybao na final a wordo aresta.  Esnan cu si a keda deteni, a ser hiba pa diferente Warda di Polis pa wordo procesa.  Cada uno a ser presenta dilanti Fiscal Auxiliar, kende a ordena pa nan keda deteni.  E otronan cu no a ser aresta, por a bay liber bek mesora.

   Team Narcotica awor ta sigui cu e investigacion den e caso aki.