Deporte ta eleva siguridad di nos pais

Parlamentario Alvin Molina (MEP): 

ORANJESTAD (AAN):  Premio Excelencia den Deporte ta reconoce e atletanan cu a destaca den aña 2023. Ta bunita pa mira cuanto hoben ta practica y destaca den nan deporte.  Mi ta bin di e mundo di husticia y mi sa con importante deporte ta pa yuda eleva siguridad den bario.

             Unabes cu un mucha ta practica deporte, e tin disciplina y ta for di caya, e no tin e tempo tampoco e animo pa haci cosnan malo.

            Durante e luna nacional di conscientisacion contra abuso di mucha ta bon tambe pa reconoce esfuersonan cu ta ser haci pa yuda nos muchanan desaroya na un manera positivo. E ta importante pa nos apoya nos hobennan y pa Gobierno di Aruba keda inverti den deporte.

            E coach- y mayornan ta dedica hopi di nan tempo liber pa guia e mucha- y hobennan pa nan desaroya den nan deporte y indirecto pa nos isla por keda sigur. Muchanan ta hopi fragil y ta depende di kico nan “omgeving” ta haci pa nan.

            Algun siman pasa, a inaugura e cancha di basketball ful renoba na Sint Maartenstreet, Village. Pa basta aña e cancha a bay hopi atras, mientras bo ta wak e mucha- hoben- y adultonan di e bario y bisindario ta haci hopi uzo di dje. Pesey, mi a haci e peticion na nos Minister di Deporte pa drecha e cancha y mi ta agradecido cu el a logra crea e fondonan necesario pa logre.

            Un suplica si ta pa hunto nos mantene e cancha, esaki ta un tarea di Gobierno di Aruba y esnan cu ta haci uzo di dje.  Mi a entrega un otro peticion na Minister di Deporte pa drecha e cancha di basketball na Esso Ville y for di comunidad mi a haya e peticion pa wak e cancha deportivo na Weg Seroe Preto.       Deporte ta eleva siguridad di nos pais. Mi ta felicita e 150 nominadonan di Premio Excelencia den Deporte y alabes ta deseanan hopi exito den nan carera deportivo.