ORANJESTAD (AAN): Partido di Oposicion ta cuestiona pakico Ministro di Salud Publico,
Dangui Oduber ainda no a reacciona riba un serie di pregunta cu desde 14 di Maart 2024, dos Parlamentario di fraccion di AVP a manda p’e.
Parlamentarionan Wyatt-Ras y Eman hunto a entrega un serie di 11 pregunta na Minister di Salubridad pa e por contesta. E preguntanan ta rond di e aumento di 23.2% den e promedio di indice di mortalidad na aña 2022 riba e isla. Sin embargo te ainda no a ricibi contesta riba e preguntanan. AVP a cuminsa pensa cu kizas e cifra di mortalidad halto y alarmante no ta un prioridad pa Dangui Oduber.
Tin diferente factor cu por a conduci na e cifra aki. Entre nan por menciona e medidanan cu Gabinete Wever Croes I y II a impone riba nos comunidad. Tanto aumento di BBO como austeridad di e lista positivo di medicina ta haci cu nos pueblo en special esnan mas vulnerable den comunidad no por yena nan frigidaire, ni por paga nan compras y nan gastonan di vivienda, awa, coriente y medicina. Con por spera e ora cu nos muchanan y hubentud por alimenta nan mes saludabel y por haya cuido medico basico?
Segun AVP, esaki tin su consecuencia pa e salud y e salud mental di comunidad y hubentud. Sin conta e placa di schoolgeld cu a subi cu famianan no por paga. Tambe por menciona e lista di espera pa haya cita cu Specialista y awor tambe tin cu warda pa mira Docter di Cas. Pues e acesibilidad di e di dos liña di cuido y hasta di promer linja a baha cu consecuencianan funesto pa nos comunidad.
Di otro banda, AVP ta convenci cu gastonan di ministers no ta baha. En especial pa loke ta trata produccionnan di luho y viahenan. Pues mientras cu e poder di compra di ciudadanonan ta baha tur dia e poder di compra di gobernantenan su cartera ta subi dia pa dia.
AVP ta reclama cu Minister encarga cu Salubridad, Dangui Oduber, den 7 aña di gobernacion como minister di salubridad no por a ni finalisa renobacion di nos Hospital, e no por ni yega na stimula compra central di medicina cu no a baha prijs di medicina y di es forma aki yuda esnan humilde den nos sociedad. Tampoco e por a yega na un grado di cooperacion entre diferente hospital y entidadnan medico pa baha gasto. Tambe gasto di referencia di pacientnan pa ricibi tratamento den exterior.
Di otro banda Dangui Oduber ta gaba y celebra cu tin surplus den AZV riba lomba di pueblo cu tin cu paga pa nan propio medicina. Ta tristo con boticario ta notifica cu tin hende tin cu laga nan remedi atras na Botica paso nan no por paga esaki, cu tur consecuencia cu esaki tin pa salud.
Awor cu cifranan cu no por gaña ta indica aumento di fayecimento di nos pueblo di Aruba, ta un must cu tin cu cuminsa tuma esaki na serio. Hulanda si a base di subida di e cifra di mortalidad cu 5% a haci investigacion y a resulta dos factor principal cu ta conduci na aumento di e cifra di mortalidad, esta posponemento di tratamento durante pandemia y stress.
Na Aruba sigur tratamento y diagnostico di malesa a haya un backlog den tratamento. Tambe ciudadanonan ta confronta stress. Esey e ex-director di Respaldo a trece padilanti na varios ocasion. Nos ciudadanonan tin cu traha dos y tres trabao pa paga debe y asina mes apenas por paga huur, scol, cuminda, medicina, vivienda, utilidad y transporte. Esnan cu no por paga nan gastonan sigur tin hopi preocupacion cu consecuencia pa nan salud mental relacion familiar. Pio ainda, tin persona den desesperacion ta comete acto ilegal pa yega na poco placa pa biba.
