Errol de Freitas di SNBA:
ORANJESTAD (AAN): E siman aki durante e presentacion di e proyectonan di inversion di Gobierno di Aruba, cu a tuma luga dilanti di Hulp Bestuurskantoor den centro di San Nicolas, presidente di San Nicolas Business Association (SNBA), Errol de Freitas, a expresa su satisfaccion cu e atencion cu Gabinete AVP-Futuro ta dunando na desaroyo di San Nicolas.
“Finalmente! Un Gobierno ta na San Nicolas”, De Freitas a exclama durante su discurso dilanti di e ministernan, parlamentarionan y publico presente. E evento a brinda oportunidad na tur minister di Gabinete AVP-Futuro pa presenta e proyectonan di inversion cu Gobierno ta preparando pa ehecucion den e proximo añanan. E presentacion a sigui aprobacion di e prome presupuesto di Algemeen Investerings- en Ontwikkelingsfonds (AIOF) pa 2026 y 2027, durante e reunion di Parlamento cu a pasa diabierna 9 di october 2026.
Den su discurso, De Freitas a destaca cu San Nicolas tin un potencial enorme pa desaroyo economico, creaccion di empleo y atraccion di inversionnan nobo. Segun e presidente di SNBA, e distrito ta ofrece oportunidad importante cu mester wordo probecha pa beneficio di su habitantenan y pueblo di Aruba en general. De Freitas a expresa su aprecio pa e acercamento cu Prome Minister Mike Eman, mencionando cu recientemente nan a sostene un reunion constructivo durante cual nan a intercambia idea tocante futuro di San Nicolas. El a destaca e importancia di un Gobierno cu ta scucha e sector empresarial y cu ta dispuesto pa traha hunto cu comunidad pa realisa e potencial cu tin pariba di brug.
Na mes momento, e presidente di SNBA a enfatisa cu despues di hopi aña di reunion, planificacion y presentacion di e visionnan, a yega momento pa pasa di palabra na accion concreto. El a señala cu e comunidad empresarial ta spera cu e atencion cu San Nicolas ta ricibi actualmente lo traduci den ehecucion di e proyectonan cu por trece cambio duradero.
Segun De Freitas, desaroyo di San Nicolas no mester ta enfoca solamente riba turismo, pero principalmente riba creaccion di oportunidad pa nos hendenan cu ta biba y traha den e districto. El a enfatisa cu Aruba mester sigui desaroya como un pais caminda progreso economico ta beneficia su propio pueblo. Durante su discurso, De Freitas a papia tambe tocante e posibilidadnan di revitalisacion di area industrial y e importancia di probecha oportunidad economico nobo. El a menciona cu e sector empresarial a entrega su vision pa futuro di San Nicolas na Gobierno y a expresa su deseo pa sigui traha mas estrecho cu diferente ministerio pa logra resultado concreto.
Business Summit III: E presidente di SNBA a uza e oportunidad tambe pa anuncia e otro edicion di San Nicolas Business Summit, cu lo tuma luga diahuebs 5 di november 2026, di 9:00 di mainta te 2:00 di atardi, na Santa Theresita Convention Center.
E evento, cu ta forma parti di celebracion di 59 aña di existencia di San Nicolas Business Association, lo carga e tema “The Common Good”, cu e lema “A Stronger San Nicolas, A Brighter Tomorrow.” E summit lo reuni e representantenan di Gobierno, Parlamento, inversionistanan y diferente orador pa intercambia vision y explora oportunidad pa desaroyo economico y social di San Nicolas. De Freitas a finalisa expresando su deseo pa mantene un relacion di colaboracion estrecho cu Gobierno di Aruba. El a reafirma cu e comunidad empresarial ta dispuesto pa contribui na e esfuersonan pa revitalisa San Nicolas y crea un futuro cu mas oportunidad pa su habitantenan.
E presentacion nacional di proyectonan di inversion di Gabinete AVP-Futuro ta forma parti di e esfuerso di Gobierno pa informa pueblo di Aruba tocante su prioridadnan pa e proximo aña. E agenda di inversion ta inclui tanto proyecto financia pa medio di Fondo AIOF como otro inversion importante den e diferente ministerionan, cu e meta di mehora calidad di bida, modernisa infrastructura publico, fortalece servicio di Gobierno y stimula desaroyo economico duradero pa nos tur.
{gallery}Finalmente, un Gobierno ta na San Nicolas{/gallery}
